Lehergailuak zituzten USB memoriak bidali dizkiete bost kazetariri Ekuadorren, mezularitza konpainia baten bidez eta gutun azal itxi batean sartuta. Horietako bat lehertu egin da. Ekuadorko Fiskaltzak ikerketa abiatu du.
Juan Zapata Barne ministroak emandako informazioaren arabera, hiru gutun azal Guayaquilera bidali dituzte, eta bi Quitora. Bost hedabidetako kazetariak dira gutun horien hartzaileak: Lenin Artieda (Ecuavisa), Mauricio Ayora (TC Television), Carlos Vera (Centro Digital), Milton Perez (Teleamazonas) eta Miguel Rivadeneira (Radio Democracia). «Konposizio bera dute, egitura bera. Beraz, helburua bera da», adierazi du Barne ministroak.
Artieda kazetariari bidalotakoa izan da lehertu den bakarra, eta Ecuavisa Ekuadorko telebista kateak erasoa salatu du. «Horrelako mehatxuek adierazpen askatasunaren eta egonkortasun demokratikoaren aurka egin nahi dute. Ecuavisak independentziaz eta erantzukizunez informatzen jarraitzeko erabakia berresten du». Jakinaraz dutenez, USB batean ezkutatua zegoen lehergaia, eta hura ordenagailuan sartutakoan egin du eztanda, erredakzio erdian. Leherketak ez du inork zauritu, ezta kalte materialik sortu ere. Joan den ostegunean jaso zuen Artiedak gutuna, eta atzo ireki.
#Comunicado | Ecuavisa rechaza cualquier intento de intimidación y amenaza a la prensa y ratifica su decisión de seguir informando con independencia y responsabilidad con el país.
— Ecuavisa Noticias (@EcuavisaInforma) March 20, 2023
Más detalles 📲 https://t.co/nusYYglptGpic.twitter.com/Lfx5kp1pdK
Argitu dutenez, Vera kazetariari bidalitako gutun azala harengana iritsi aurretik atzeman dute, eta erredakzioetara bidalitako gainerakoak ez dira aktibatu. Gutun azalek RDX lehergaia zuten, USBetan ezkutatua.
IACHRren Adierazpen Askatasunerako Kontalaritza Bereziak gertakariak ikertzeko eskatu dio Ekuadorko Estatuari, eta arriskuan egon daitezkeen kazetarien babesa bermatzeko. Ekuadorko Kazetari Askeen Sareak ere erasoa arbuiatu du, eta kazetarientzako babes mekanismoak exijitu.
