Erretreten erreforma gainditu, eta ondoko fasera pasa nahi du Emmanuel Macron Frantziako presidenteak. Helburu horrekin egin du telebistako mintzaldia astelehen arratsalde honetan, azken hilabeteetako mugimendu soziala baretu, eta ondoko hilabeteetarako Frantziako Gobernuaren norabidea azaltzeko asmoarekin. Ordu berean ehunka protesta antolatu dituzte Frantziako Estatu guzian zehar, kazolak eskuan presidentearen ahotsari gaina hartzeko.
Ostegunean eman zuen erreforma ontzat Frantziako Konstituzio Kontseiluak, eta biharamunerako promulgatu zuen Macronek. Telebistako agerraldian ezinbesteko neurria zela berretsi du: «pentsioak bermatzeko eta aberastasun gehiago sortzeko». Presidentearen hitzetan, ez zegoen «beste aukerarik», baina «indar» bat eskatzen badu ere, neurri aringarriak ere badirela erran du.
Aitortu du erreforma ez dela «onartua», eta adierazi den «haserrea» aintzat hartu du, baina «zatiketen gainetik» aitzina egin eta «batasuna» aldarrikatu du.
Hiru lansail
Ondoko hilabeteetarako hiru lansail finkatu ditu Frantziako presidenteak. Lanarena lehenik: langabeziaren aitzinean emaitza onak lortu dituztela erran du, «1,7 milioi enplegu sortu ditugu azken sei urteetan». Lizeo profesionalaren erreforma, eta gutxieneko errentan direnak lanera eramateko neurriak ere aipatu ditu.
Patronalarekin bilkura eginen du bihar gai horiek aipatzeko; sindikatuak ere gomitatu ditu, baina erreforma bertan behera uztea jarri dute baldintza gisa edozein elkarrizketa abiatzeko. «Atea beti irekia izanen da», adierazi du Macronek.
Justizia eta ordena demokratikoa ere jarri ditu helburu: 10.000 agente eta magistratu kontratatuko dituzte, eta berrehun jendarmeria unitate irekitzen ari dira landa eremuetan. Legez kanpoko imigrazioaren kontra segitzeko asmoa ere erakutsi du.
Hezkuntza eta osasuna aipatu ditu azkenik. «Batasuna» lehenetsi du: «Elkarrekin epidemiari eta krisi bat baino gehiagori aurre egin diegu. Aldi bakoitzean, elkarlana helburu, nazioaren interesak lehenetsita». Ildo beretik jo behar dutela erran du. «Lege eta burokrazia gutxiago, eta askatasun eta ekintza gehiago», aldarrikatu du.
