Gasteizko gazte bat hil da asteburuan Villarrobledon (Espainia) ospatu den Viña Rock musika jaialdi ospetsuan. Larunbat iluntzean, jaialdiaren eremura sartzeko gunean, gaizki sentitzen hasi zen 25 urteko gaztea, eta konortea galdu zuen. Haren lagunek eman zieten abisua osasun zerbitzuei; hasieran, lortu zuten gaztea suspertzea, baina azkenean ospitalean hil zen.
Ikerketa zabaldu dute heriotzaren arrazoiak argitzeko. Lehen hipotesien arabera, litekeena da bihotzeko gaitz baten baten ondorioz hil izana. Baztertu egin dute heriotza bortitzaren aukera, baina oraindik analisi toxikologikoa eta autopsia egiteko zain daude.
Gorka Urtaran alkateak doluminak eman dizkie hildakoaren gertukoei: «Oso albiste tristea da». Fitness Gasteiz klubean karatea egiten zuen hildakoak.