Maddalen Iriartek Eusko Legebiltzarra utzi du gaur; EH Bilduren bozeramailea izan da 2016tik orain arte. Maiatzaren 28ko udal eta foru hauteskundeetan, EH Bilduren Gipuzkoako ahaldungai nagusia izango da, eta kanpainaurreari heltzeko utziko du kargua.
Iriartek bere azken saioa baliatu du agurra formalizatzeko; Iñigo Urkullu lehendakariari egindako galdera batean hartu du horretarako tartea, hain zuzen ere. Azaldu duenez, Gipuzkoako «erronkei» konponbideak bilatzeko utzi du kargua, baita lurralde horretako biztanleen beharrei erantzuteko ere. Lehendakariak, berriz, Iriarterekin izandako harreman ona nabarmendu du, eta «onena» opatu dio maila pertsonalean.
