Guardia Zibilak bi pertsona atxilotu ditu Arabako Errioxan, «lan esplotazioa helburu duen gizakien trafikoagatik». Espainiako Gobernuaren EAEko ordezkaritzaren arabera, otsailean hasi zuen Guardia Zibilak Worker operazioa, esplotazio saretik ihes egitea lortu zuen pertsona batek bizitakoa salatu ostean. Ikerketa hasi zuten orduan, eta Portugalgo Polizia Judizialarekin batera joan den astean egindako operazioan lortu zuten atxiloketak egitea, baita esplotazio sarearen biktimak askatzea ere. Gasteizko Instrukziozko Lehen Epaitegiaren eskuetan dago kasua, eta epaileak behin-behineko espetxealdia ezarri die atxilotuei.
Ordezkaritzaren arabera, baldintza «deitoragarrietan» bizi ziren Portugalgo etorkinak, «giza duintasunarekin bateraezinak diren baldintzetan», eta esklabotza modernotzat jo dute haien egoera. Denis Itxaso Espainiako Gobernuaren ordezkariak azaldu duen moduan, jatorrizko herrialdean hartu eta lan egingo zuten tokira eramaten zituzten langileak. Asteko egun guztietan egiten zuten lan Arabako mahastietan, eta ia hamabi orduko lanaldiak zituzten; eta haiek menperatzeko, «menpekotasun ekonomikoa» erabiltzen zuten. Espainiako Gobernuaren ordezkaritzaren arabera, hilabetez lanean ibili ostean langile batzuek zor ekonomikoa zuten jabeekin, eta horrek esplotazio sarean jarraitzera bultzatzen zituen.
Atxilotuen etxean, miatzean, 9.300 euro aurkitu zituzten, baita bi itxurazko pistola eta ikerketarekin harremana duen dokumentazioa ere. Bestalde, esplotazioari esker lortutako etekinekin erositako bost higiezin ere topatu dituzte.
