Arabako lautadan biosfera erreserba bat sortzea proposatu du EH Bilduk

Krisi klimatikoari aurre egiteko asmoz, EH Bilduk udal eta foru erakundeetatik bultzatuko dituen hainbat neurriren berri eman dituzte gaur Rocio Vitero Gasteizko alkategaiak eta Felix Gonzalez Arabako Batzar Nagusietako hautagaiak. Besteren artean, konpromisoa hartu dute «irizpide ekosozialetan» oinarritutako trantsizioa azkartzeko eta biodibertsitatea errespetatzeko, eta hori lortzeko proposatu dute Arabako lautada Unescoren biosferaren erreserba izendatzea.

EH Bilduko hautagaien ustez, biosferaren erreserbak ongi diseinatuta eta kudeatuta daudenean «tresna baliagarriak» dira lurralde bat iraunkortasunaren ikuspegitik egituratzeko. «Arabako lautadan erreserba bat egoteak orain sakabanatuta dauden naturguneak lotuko ditu eta balioa emango die, eta erreserba apartekoa izango da, Gasteiz bezalako tamaina erdiko hiri bat barruan hartuko duelako», azaldu du Gonzalezek.

EH Bilduren iritziz, Zadorraren goi arroak betetzen ditu biosferaren erreserba izendatzeko beharrezko baldintza guztiak. Koalizioak proposatu duen eremua Zadorra ibaiaren arroaren goiko aldeari dagokio: 950 kilometro koadroko azalera hartuko luke denera, eta hamalau udalerri eta 275.000 biztanle bilduko lituzke bere baitan. Gasteizko mendiak, Arrato mendilerroa, Gorbeia eta Aizkorri-Aratz parke naturalak, Urkiolako eta Entziako mendilerroak eta Iturrietako mendien esparrua hartuko luke biosferak.

«Unescok inoiz Araban egindako lehen aitortza izango litzateke, eta mundu mailan ezaugarri horiek dituen gutxienetarikoa, bere baitan Gasteiz egongo litzatekeelako», Gonzalezek azaldu duenez. Biosfera erreserbak hiru gune izango lituzke, EH Bilduk egindako planaren arabera. «Eremu nagusian», periferia eta eremu babestuak leudeke. «Eremu tanpoia», berriz, gune nagusiaren ondoko zonaldeek osatuko lukete. «Trantsizio eremua», azkenik, lurraldearen gainerako zatiak beteko luke.

Koalizioak proposatu du erreserbaren kudeaketa patronatu baten bidez egitea, eta bertan bermatua egotea udal guztien eta interesa duten eragileen parte hartzea eta erabakitzeko gaitasuna.

Karbonoan neutroa
Udal mailan, berriz, 2030. urterako karbonoan neutroa izateko helburuari eutsi dio Viterok, iritzita Gasteizek «erreferente» izan behar duela klima aldaketaren aurkako borrokan. Gasteizko alkategaiak gogora ekarri du duela lau urte koalizioak hiriburua karbonoan neutroa izateko plan bat aurkeztu zuela, eta hainbat neurri martxan jartzeko konpromisoa duela. Gasteizen energia berriztagarrien hedapena «modu parte hartzailean» planifikatzeko konpromisoa da horietako bat: «Jendaurreko informazio eta eztabaida prozesu baten bidez egin nahi dugu. Interesa duten eragile guztiei parte hartzeko gonbita egingo zaie, baita talde politikoei eta herritar guztiei ere, akordio politiko eta sozial ahalik eta zabalena lortze aldera». Horrekin batera, udalerriko lurzoru antropizatuetan–tartean Noryesteko presagaineko proiektu ohiaren lurzoruetan eta Ariñez eta Gometxa arteko Jundizko sarbidean– tamaina ertaineko eguzki baratzak ezartzeko aukera aztertuko dute.

Horrez gain, Viterok azaldu du udalerriko auzo eta herrietan energia komunitateak garatu eta trantsizio komunitarioa sustatzeko bulegoak ireki nahi dituztela. Udal aholkularitza energetikoak ere martxan jarri nahi dituzte, norbanakoak eta enpresak laguntzeko.