LAN ITUNAK
Bizkaiko merkatarien hitzarmena berritu dute, 33 bilera egin ostean
ELAk eta patronalak lortu dute 3.700 langileri eragiten dien hitzarmena berritzeko akordioa. 2023an %12 igoko dituzte soldatak, eta 2026rako %20koa izango da igoera.
Bizkaiko merkataritzako lan hitzarmena berritzeko akordioa lortu dute patronalak eta ELA sindikatuak —gehiengo absolutua du sektorean—; 33 bilera egin behar izan dituzte 2015etik berritu gabe zegoen lan ituna hitzartzeko. 2023tik 2026 amaierara arteko iraupena izango du itunak, eta lehen urtean %12 igoko dituzte soldatak, eta 2024., 2025. eta 2026. urteetan KPI kontsumorako prezioen indizearen araberako soldata igoerak izango dituzte, baita atzerapenak ere. ELAren arabera, 2026an baliteke %20raino ere igotzea soldatak.
Sindikatuaren arabera, saltzaile kategoria duten langileek hilean 1.346,5 euroko oinarrizko soldata izango dute, eta, hitzarmenaren indarraldiaren amaieran, berriz, 1.485,6 eurokoa. ELAren kalkuluen arabera, %20ko soldata igoera izango da hori, aurreko hitzarmeneko soldatekin alderatuta. Online salmentarako beharrezkoak diren teknologiek sortutako lan karga konpentsatzeko plusak ere hitzartu dituzte: 1.000 euroan hasiko dira, eta gutxinaka igoz joango da, 1.100 eurora iritsi arte.
Urteko lanaldia 8 ordu murriztea ere adostu dute, baita udako larunbat arratsaldeetako librantzak, antzinatasuna eta bajen osagarriak mantentzea ere. ELAk adierazi du langileen antolakuntzari eta borrokari esker lortu dela akordioa, eta aurreko hitzarmenarekin alderatuta aurrera egin dela nabarmendu du.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
