Bi agiri erkatu behar dira aldea ikusteko: lehengo urtekoa, eta aurtengoa. Iazkoa maiatzaren 22koa da, Eusko Jaurlaritzako Hezkuntza Saileko Langileak Kudeatzeko zuzendariarena. Aurtengoa ere harena da, apirilaren 27an egindakoa. Biek helburu bera dute: Berritzegune Nagusian «kolaboratzaile» jarduteko hainbat lanpostu betetzeko deialdia egitea hezkuntza sisteman lanean ari diren profesionalen artean: funtzionarioak izan daitezke, edo lan kontratu finkoa dutenak. Iazkoak hautaketa prozesu horretan derrigorrez euskaraz jarduteko eskatzen zuen; aurtengoak, aldiz, ez.
Prestakuntzan eta hezkuntzaren berrikuntzan laguntzeko zentroak dira Berritzeguneak. Zentro nagusi bat dute, Bilbon, eta eskualdeka arta ematen duten zentro txikiagoak daude gero.
Hezkuntza Sailburuordetzak hala eskatuta egindako ebazpena da. Langile guztiek bete behar dute administrazioak hezkuntzarako eskatutako 2. hizkuntza eskakizuna; horretan ez da aldaketarik. Baina apaltze bat dago propio Berritzegunean lanean hasteko egin behar izaten den ahozko aurkezpenaren gaineko hizkuntza eskarian. «Defentsa euskaraz egingo da», jartzen du iazko ebazpenean. Derrigortasun hori kendu egin dute heldu den ikasturterako egin dutenean. Zera jarri dute: «Defentsa ahal bada euskaraz egingo da».
Lanpostuak betetzeko eskatzen zaizkien gainerako eskakizunez harago, ahozko proba hori da hautaketa prozesuan pisurik handiena duena. «Prozesutik kanpo geratuko dira memoriaren defentsari eman dakiokeen puntuazioaren %50 gutxienez lortu ez dutenak». Gutxieneko puntuazioa gainditu baina hautatuak izan ez diren izangaiei propio onartzen zaie lanpostu bakoitzean sortuko den lan poltsa batean sartzeko aukera. Izangaiek eskatutako lanpostuko gaitasun «espezifiko eta teknikoei» buruz egin behar dute memoria.
Aurreragoko ebazpenak aztertuta, ahozko aurkezpenen eskaririk ez da ageri; izangaiek idatziz egin behar zuten memoria. Iaz, batzordeak eratzen hasi ziren memoriaren «ahozko defentsa» baloratzeko. Memoria horrek «berritzailea» izan behar du, besteak beste, eta helburu eta jarduera ildo nagusiak «argi eta garbi» identifikatu.
Hezkuntza Sailak azaldu du motibo «juridikoak» daudela aldaketaren atzean. Argudiatu du behin ja izangaiei hizkuntza eskakizun bat ezarrita, eta hori betetzen dutela ziurtatuta, legez ezin direla derrigortu probak hizkuntza ofizial bakar batean egitera.
