Ertzaintza oldartu egin da Erandioko etxegabetze batean

Goizean goizetik, hainbat lagun elkartu dira gaur Erandion (Bizkaia) etxegabetze bat eragozteko. Kaleratzea hainbatetan atzeratu ostean, gaurko zegoen ezarrita behin betiko eguna, 11:00etarako; Polizia garajetik etxebizitzara iristen saiatu denean, istiluak izan dira Ertzaintzaren eta manifestarien artean. Azkenean, 12:45ak aldera lortu dute etxebizitzako atea ireki eta barruan zeudenak ateratzea, sarrailagile baten laguntzaz.

Bilboko Etxebizitza Sindikatuak eta Uribe Kostako GKS Gazte Koordinakunde Sozialistak deitu dute ekintzara. 10:30ak alderako hasi dira protestak, «etxegabetzea gelditu!» oihu artean, eta goizak aurrera egin ahala gero eta handiagoa izan da Ertzaintzaren presentzia. Azkenean, Polizia eraikinaren garajetik sartu da atarira, eta hara sartu dira protestan zebiltzanak ere. Ertzaintza oldartu egin zaie orduan. Protestaren amaieran jakinarazi dutenez, gaur beste etxegabetze bat ere izan da Erandion.

Hustu nahi duten etxea Caixabank bankuaren jabetzakoa da, eta han bizi den gizonak bost urte daramatza bertan. Hala azaldu du etxegabetzearen aurretik Bilboko Kontseilu Sozialistaren Twitter kontuan eman dituen azalpenetan. Aurrez, etxeak beste bost urte zeramatzan itxita.

Ordutik hainbat epaiketa izan ditu; bi irabazi ditu, baina azkenekoa galdu zuen, eta orain «trikimailuen bidez» etxegabetzea aurreratzea lortu dutela esplikatu du.

Udalak bizitzeko beste leku bat eskaini zion Sestaon (Bizkaia), 1902an eraikitako eraikin batean, baina duela hilabete «gune degradatu» izendatu zuen hura EB Europako Batasunak. Argi utzi du berak sekula ez diola esan ezetz aukera horri, baina «zalantza batzuk» argitu nahi izan zituela udaleko ordezkariekin: «Ordaintzeko dirurik ez banuen zer gertatuko zen galdetu nien; ea kalera botako ninduten. Baietz esan zidaten. Hilabete bat aldez aurretik ordaindu behar nuela ere jakinarazi zidaten, zerbitzu guztietan alta emateaz eta aseguru bat kontratatzeaz gain. Esan nien gaur egun ez dudala horretarako adina diru».

Beraz, adierazi du gaur-gaurkoz ez duela beste aukerarik, eta eskerrak eman dizkie gaur etxegabetzea eragozteko elkartu diren guztiei.