Trinitate plazak, Kursaal auditoriumak, Victoria Eugenia antzokiak, San Telmo museoak, Zurriolako Keler agertokiak eta Garbera merkataritza guneak dagoeneko jakinarazi dituzte 58. Jazzaldiko kartelburu izango diren 36 kontzertuak. Nolanahi ere, ohi moduan, Donostiako Jazzaldiak hiriko txoko guztietara zabalduko du jazza, eta doako kontzertuak emango dituzte tokiko zenbait taldek.
Jazzaren euskal talentuari deialdia zabaldu eta zortzi hilabetera, antolatzaileek erabaki dute zein hamar taldek joko duten Kursaaleko terrazetako agertokietan –Frigo gunean, Fnac gunean eta Nauticool gunean–: Isla hirukotea, Arnaud Labastie hirukotea, Xahu, Motelas, Les Cuisinieres, Lutfi Jakfar Sixth hirukotea, Amaika Rude, Mikel Legasa boskotea, Xavi Maldonado eta David Cid laukotea, eta Kinkfolk.
Talentu gipuzkoarrak
Kantaldi bat gehiago izango da Nautikoko agertokian; Elena Setien donostiar musikagilearena, hain zuzen. Gainera, aurtengo aldian, talentu gipuzkoarrak ere bere lekua izango du. Izan ere, talde hauek arituko dira Katapulta Tour izendatu duten zirkuituan: Bamms, Nakar, Olana Liss eta Ramada Inn.
Gonzalo Encinal piano jotzaileak eta Fran Serrano kontrabaxu jotzaileak goizeko emanaldia egingo dute uztailaren 21ean, San Martin merkatuan. Hurrengo egunean, berriz, Aitor Marimon (gitarra) eta Rodrigo Lauroba (saxofoia) bikotea ariko da oholtza berean.
Bestalde, Eri Yamamotok kontzertu bat emango du afaltzeko garaian Maria Cristina hoteleko Ibaia aretoan. Uztailaren 23an izango da hori, iluntzeko 20:30ean. Kontzertu horretarako sarrerak salgai daude dagoeneko jaialdiaren webgunean, 80 euroan.
Freedom First
Jazzaldiak Freedom First izeneko ziklo berria aurkeztuko du Victoria Eugeniako Klub aretoan, uztailaren 24an eta 25ean, 20:00etan. Bertan, Albert Marques piano jotzaile kataluniarrak Keith LaMar Estatu Batuetako presoarekin batera grabatutako disko berria aurkeztuko du. Marques eta bere hiru musikariak oholtza gainean egongo dira, eta, distantziatik, grabazioen bidez entzun ahal izango da LaMarren ahotsa; ziegatik, zuzeneko konexioan.
