«Gobernuetan gaudenean, sozialistok politika klimatikoak agenda sozialean eta politikoan jartzen ditugu». Hori izan da Jose Ignacio Asensiok, PSE-EEren Gipuzkoako ahaldungai nagusiak, gaur helarazi nahi izan duen mezua. Irungo (Gipuzkoa) Osinbiribil parkean egindako ekitaldian, Bidasoa ibaiaren ertzean, harekin izan ditu gaur goizean Teresa Ribera, Espainiako Gobernuko Trantsizio Ekologikoko ministroa, eta Jose Antonio Santano, Irungo alkategaia.
Asensio Ingurumen diputatua da Gipuzkoako Foru Aldundian, eta nabarmendu du postu horretan egon den bitartean klima aldaketaren aurkako borrokaren «abangoardian» kokatu duela Gipuzkoa. Udalerri ugaritan bultzatutako komunitate energetikoen sorrera goretsi du, besteak beste. Azaldu du komunitate horiei esker 8.000 familiak %30 gutxiago ordaintzen dutela energiaren faktura.
Irungo alkategaiak, berriz, martxoan Espainiako Gobernuaren eta Irungo Udalaren artean egindako akordio bati eman dio garrantzia; Artiako kanala birnaturalizatzeko proiektuari, alegia. Esan du urte askotan Bidasoari «bizkarra» eman ostean, hari begira jarri duela Irun.
Riberak ere proiektu hori nabarmendu du, eta Asensio eta Santano goraipatu ditu. Adierazi du trantsizio ekologikoa bultzatzerako orduan, «oso aktiboak eta eraginkorrak» izan direla bi sozialistak.
Hirurek esan dute «eraginkorra» izan dela Espainiako Gobernuaren, Gipuzkoako Foru Aldundien eta Irungo Udalaren arteko harremana, «sozialistei esker».
