Los Pajaritos estadioaren kanpoaldean gertatu zen, Jose de Tudela kalean, atzoko 17:30 baino lehenago. Ordu horretan hastekoa zen etxeko taldearen eta Cornellaren arteko futbol partida. Ultraeskuindar batzuek jo egin zuten Donostiako 44 urteko gizon bat. Gizonak konortea galdu zuen, eta ospitalera eraman zuten.
Espainiako Gobernuak Sorian duen gobernuaren ordezkaritzak adierazi zuen «arin zaurituta» zegoela gizona, baina haren bikotekideak ukatu egin du, Naiz agerkarira deituta. Bikotekidearen arabera, ez dago arin zaurituta: medikuek koma eragin diote gizonari, burezurrean haustura bat duelako, eta belarriko hezur batean beste haustura bat. Gainera, kolpeak ditu.
Gizonaren bikotekideak adierazi duenaren arabera, ultraeskuindarrak taberna batera sartu ziren, eta bertan zeudenei kolpeka hasi zitzaizkien. Haren senarra lurrean botata eta odoletan utzi zuten. Erasoa jasan zuenean, Donostiako eta Cornellako (Herrialde Katalanak) bi lagunekin zegoen gizona.
Bikotekideak azaldu du, bestalde, Espainiako Poliziarekin harremanetan jarri dela, atestatuan gehitu dezaten senarra larri zauritutakoen artean dagoela. Poliziak osasun agiriak aurkezteko eskatu dio.
Soriako Gobernu Ordezkaritzara deituta, gizon horren osasun egoera zein den ez dakitela adierazi diote BERRIAri. Ospitalera eraman zutela besterik ez dakitela. Los Pajaritos kanpoko istiluengatik bi pertsona atxilotu zituzten larunbatean. Epailearen aurretik igaro ostean, aske utzi dituzte.
