Hizkuntza eskubideak
Oposizioak euskaraz egiteko aukerarik ez die eskaini Arkautik suhiltzaileei
Arartekoak ebatzi du oposizioetako partaideen hizkuntza eskubideak «urratu» zituztela, eta ELA sindikatuak auzi eske bat jarri du epaitegietan.
Iazko azaroan, suhiltzaile ugarik oposizioak egin zituzten Gipuzkoan eta Araban. Arkautiko (Araba) Akademiak antolatu zituen azterketa horiek, eta parte hartzaileei ez zien eskaini probak euskaraz egiteko aukerarik, ELA sindikatuak salatu duenez. Parte hartzaile batzuek proba psikoteknikoa euskaraz egin nahi zutela adierazi zieten oposizioen antolatzaileei, baina haiek ez zieten aukera hori eman, eta gaztelaniaz egin behar izan zituzten probak. Gainerako probak —teorikoa, adibidez— ere gaztelaniaz egin zituzten partaide guztiek. «Ikasketa material gehiena gaztelania hutsez egonik, gaztelaniaz egitera behartuta ikusi zuten beren burua», salatu du sindikatuak. Izan ere, azterketa horiek ez daude euskaraz homologatuta.
Hainbat suhiltzailek Arartekoari kexa bat helarazi zioten, eta hark ebatzi du suhiltzaile oposizioetako probak euskaraz homologatuta ez egoteak euskaldunen hizkuntza eskubideak urratzen dituela. ELA sindikatuak auzi eske bat jarri du epaitegietan, gertatutakoa «berdintasun printzipioaren eta hizkuntza eskubideen kontrakoa» dela argudiatuta. «EAEn euskara zein gaztelania hizkuntza ofizialak izanda, oposizio publiko batean aukerako hizkuntza erabili ezin izatea hizkuntza eskubideen urraketa larria da». Horregatik, ELAk Arkautiko Akademiari «exijitu» dio euskaraz egin ezin izan zituzten azterketako atalak baliogabetzeko, eta kalifikazioa moldatzeko. Azterketa psikoteknikoa euskaraz egiteko eskatu zuten, eta horiek berriro egiteko aukera izan dezaten ere eskatu du, «eskatutako hizkuntzan».
«Berez oposizioa prestatzea zaila baldin bada, administrazioak eragindako estres linguistikoak are zailagoa egiten du», adierazi du ELAk.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
