Elma Saizek Iruñeko alkate izan nahi du. PSNko hautagaiak aurretik ditu eserlekuetan UPNko eta EH Bilduko hautagaiak: PSNk bost zinegotzi atera ditu M-28ko hauteskundeetan; EH Bilduk, zortzi; eta UPNk, bederatzi. Baina hirugarren indarra izanda ere, Saizek argi helarazi du Iruñeko aginte makila nahi duela eta, horretarako, Geroa Bairekin eta Zurekin Nafarroarekin negoziatuko duela. Saizek ez du esan koalizioa abertzalearekin negoziatzeko asmoa duenik, baina, edonola ere, EH Bilduren babesa beharko luke alkate izateko.
PSNko hautagaiaren nahiak EH Bilduko alkategai Joseba Asironen helburua ez betetzea ekarriko luke, koalizio abertzaleak Iruñeko aginte makila espero duelako, hain zuzen, PSNren aldeko ekarpenarekin. Oraingoz, ordea, Saizen asmoak oso bestelakoak dira. «PSNk, Geroa Baik eta Zurekin Nafarroak babes sozial handiagoa daukate EH Bilduk baino», esan du, eta erantsi hiru talde horiek koalizioak baino mila boto gehiago atera dituztela. Hori dela eta, Geroa Baiko alkategai Koldo Martinezi eta Zurekin Nafarroako alkategai Txema Mauleoni deituko die, «udal gobernu bat eraikitzeko, elkarrizketarako gobernu bat, elkarbizitzarako, gobernu aurrerakoi bat».
Euskara eta ikurrina
Saizek argi esan du ez diela alkatetza emango ez UPNri ez EH Bilduri. «Eskuinaren eta independentismoaren alternatiba gara. Gaur bertan hasiko naiz udala eratzeko lanean». Ea EH Bilduren babesa espero duen galdetu diote PSNko alkategaiari, eta erantzun du «pausoz pauso» joan nahi duela, baina zehaztu du Nafarroako Gobernuan «onuragarria» izaten ari dena, «formula esportagarria» dela Iruñeko Udalera.
EH Bilduri babesa zergatik ukatuko dion ere azaldu du Saizek; haren arabera, Asiron alkate izan zenean «inposizioan» aritu zen «euskararekin». Haurreskolak eta udal lantaldea aipatu ditu euskararen «inposizioarekin» lotzeko. Uztailaren 6an ere udaletxeko balkoian ikurrina altxatu zuela gogoratu du PSNko alkategaiak, eta hiriko «bost eskolatan hizkuntza eredua» aldatu nahi izan zuela azpimarratu du, euskararekin lotutako beste hainbat osagairen artean. Finean, Saizek uste du Asironek ez zuela «aniztasuna elkarbizitza bihurtu».
