Elkartasunak Eraiki sareak trantsizio hirigintzari buruzko «azterketa eta gogoeta serios» bat abiatzeko eskatu du. «Baliagarria, egokia eta etikoa izan daitekeen aukera berri bat sor lezake, aldi baterako erabilgarri diren lurren erabilpena optimizatzeko, gizarte bokazioa duten lurraldeko proiektuen zerbitzuko», adierazi dute agiri batean. Zentzu horretan, Baionako Santa Ursula karrikako 16. zenbakian eraikin bat okupatu duten Maurizia proiektuko gazteen eredua goraipatu dute, eta adierazi dute tokiko instituzioen eta elkarteen eskura egon daitekeen «alternatiba interesgarri bat» bilaka daitekeela.
Maurizia proiektuari egindako aitortza horrek ez du garrantzia txikia, Ipar Euskal Herrian gizarte elkartasunaren arloan ari diren egitura nagusiek osatzen baitute Elkartasunak Eraiki sarea. Kide dira, besteren artean, Atherbea, Alda, Gurutze Gorria, Abbé Pierre fundazioa, Langile Gazteen Etxea edota Sokorri Katolikoa. Instituzio publikoekin elkarlanean aritu ohi diren elkarteak dira gehienak.
Atzo, Maurizia proiektuko kideekin bildu ziren, eta haien iritzia «baieztatu» zuen: «Etxebizitzaren krisiari erantzuteko eta Ipar Euskal Herrian dimentsio soziokulturala sustatzeko modelo serios berri bat irekitzen du». Azpimarratu dute okupatzaile gazteek borondatea dutela haien presentzia «baimentzeko», eta urrats hori ezinbestekoa dela espazio hori biziarazteko. Horretarako izan daitezkeen tresna juridikoak ere aipatu dituzte agirian. «Espero dugu aterabide baikor bat aurkituko dela Maurizia proiektuarentzat. Adi egonen gara bilakaerari buruz».
Etxegarairen esku
Baionako Auzitegiak kanporatzeko agindua emana du, baina gazteak entzun gabe hartu zuen erabakia. Defentsarako eskubidea aldarrikatuta jarri duten helegitea uztailaren 6an aztertuko dute. Anartean, edonoiz kanpora ditzakete.
Gaur goizean, Jean Rene Etxegarai Baionako auzapez eta Euskal Hirigune Elkargoko lehendakariarekin bildu ziren gazteak proiektua aurkezteko. Bi eskaera egindizkiote: EPFL egiturak helegitea aurkeztu bitartean kanporatze prozedura etetea, eta alokairu kontratu baten bidez haien egoera baimentzea. Bilkuraren ondotik, Claude Olive EPFLko presidentearekin bazkaltzekoa zen Etxegarai. Gazteek argi dute: «Gelditzekotan Etxegaraik gelditu dezake».
