Sexismoa

«Euskal Herrian emazteak sukaldean gelditzen dira», esan du Baionako Aviron taldeko presidenteak

Philippe Tayeb errugbi taldeko buruak eta Pirinio Atlantikoetako kontseiluko presidente Jean-Jacques Lasserrek «adierazpen matxistak» egin dituzte kazetarien aurrean

AB Etxea kirol trebakuntzarako gunea zabaltzeko ekitaldia, atzo, Baionan. GUILLAUME FAUVEAU
2023ko maiatzaren 31
19:03
Entzun

«Nire emazteari zapatak nola garbitzen diren erakutsi beharko litzaioke», eta «Euskal Herrian emazteak sukaldean gelditzen dira». Baionako Aviron errugbi taldearen AB Etxea trebatokia inauguratu zuten atzo Lapurdiko hiriburuan. Ekitaldian izan ziren Pirinio Atlantikoetako kontseiluko presidente Jean-Jacques Lasserre eta taldeko presidente Philippe Tayeb. Haiekin egon ziren kazetariek salatu dute bi agintariek adierazpen matxistak egin zituztela, Mediabask hedabidearen arabera.

Gizon giroan zeuden bi agintariak, agerraldian ez baitzen emakumezkorik egon. Kirolariak trebatzeko gune berria ireki du taldeak, eta Frantziako banderaren koloreak zituen xingola moztu zuten.

Ondoren, bisita egin zuten ordezkari politikoek eta kirol taldekoek, kazetariekin. Jokalarien aldageletan sartzerakoan kranpoiak oso garbi zeudela nabarmendu zuen Lasserrek, kazetarien arabera. «Nire emazteari zapatak nola garbitzen diren erakutsi beharko litzaioke», gaineratu zuen.

Hainbat kazetari asaldatu egin ziren politikariaren adierazpena entzunda, eta galdetu zuten zergatik ez zegoen emakumerik ekitaldian. Tayebek, orduan, Lasserreren tonuari eutsi, eta adierazi zuen zentroak AB Etxea duela izena, «eta, beti erran didatenez, Euskal Herrian emazteak sukaldean geratzen dira».

Ordezkariak, aldageletan. Lasserre eskuinean, eta, haren parean, Tayeb.

Kazetariek ohartarazi zieten esandakoak grabatzen ari zirela, baina arduradunek bisitaldiarekin jarraitu zuten normaltasun osoz.

Ihintza Arrieta Euskal Irratietako kazetariak sare sozialetan agertu du haserrea. «Parekidetasuna ez da iritsi errugbiko agintariengana».

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.