Gutxienez bost pertsona hil dira presa suntsitzearen ondorioz

Gutxienez bost pertsona hil dira Kherson eskualdeko presa suntsitzearen ondorioz. Errusiak jakinarazi zuen zazpi pertsona zeudela desagertuta, eta gaur adierazi dute horietatik bost itota hil direla. Beste biak ebakuatzen ari dira. Gainera, berrogei lagun inguru ospitaleratu dituzte.

Ondorio larriak eragin ditu Kherson eskualdeko Nova Kakhovka hiriko presan geratutako txikizioak, eta Errusiak eta Ukrainak elkarri mokoka eta elkarri errua egozten jarraitzen dute; 40.000 lagun inguru daude uholde arriskuan. Egoera horretan, Volodimir Zelenski Ukrainako presidenteak salatu du Errusiak erasoak egiten segitzen duela erreskate lanetan ari diren bitartean.

Ukrainako erreskate zerbitzuek emandako azken datuen arabera, 2.000 pertsona ebakuatu dituzte. Azaldu dute seiehun kilometro karratu inguru geratu direla ur azpian; horietatik %32 Kieveko gobernuaren kontrolpean dagoen eremuan, eta %68 Errusiak okupatutakoan.

Moskuk jakinarazi duenez, berriz, 4.500 lagun inguru ebakuatu dituzte –6.500 pertsona, beraz, guztira–. Gaur hasiko dira ura ponpatzen, eta, hala, «konpontzeko prozesuari» ekingo diote. Jakinarazi dute urak behera egiten segitzen duela: 1,2 metro jaitsi da.

NBE Nazio Batuen Erakundearen arabera, berriz, presa suntsitzearen ondoriozko kalteak areagotu egingo dira datozen orduetan. «Herri eta herrixka gehiago urez betetzen diren heinean, hondamendiak okerrera egingo du. Osasun arriskuak nabarmen areagotuko ditu, eta eragina izango du funtsezko zerbitzuak eskuratzeko orduan». Edateko ura lortzeko zailtasunak izatea da haien kezka nagusietako bat.

Errusiak du kontrolpean presa zegoen Dnieper ibaiaren ekialdeko ibarra, eta Ukrainak mendebaldekoa. Kievek esan du Moskuk suntsitu duela presa, eremua urak hartu eta okupatutako lurrak berreskuratzeko asmoa oztopatzeko. Errusiak, berriz, Ukrainari leporatu dio jazotakoa.

Hala ere, Zelenskik herenegun nabarmendu zuen gertatutakoa ez dela «oztopo» izango iragartzen ari diren kontraerasorako; Errusiak gaur iragarri du ukrainarrek hiruzpalau egun daramatzatela eraso bortitz bati ekin nahian herrialdearen hegoaldean. Vladimir Rogov Ukrainako Zaporizhia eskualdean Errusiak duen ordezkariaren arabera, horrek esan nahiko luke Ukrainak ez duela berehalako eraso bat egiteko asmorik presa suntsitu den eremuan.

Zentral nuklearra, arriskuan?

IAEA Energia Atomikoaren Nazioarteko Agentziak Zaporizhiako zentral nuklearrean duen presentzia indartuko du datorren astean. Urtegiko ura erabiltzen dute erreaktoreak hozteko, eta kezka eragin du presa suntsitzeak. «Istripu nuklear bat» izateko arriskua saihestu nahi dute. Urak behera egin du urtegian, eta zentral nuklearrak erreserbak handitu ditu horren aurrean. Biltegikoa «hainbat hilabetetarako» nahikoa izango dela uste dute.