Maurizia: «Kanporatzen bagaituzte, okupazio dinamika bat abiatuko dugu»

Damoklesen ezpata buru gainean dute Maurizia proiektuko kideek, eta edonoiz kanporatu ditzakete. Agerraldia egin dute egoeraren berri eman eta azken asteetan izan dituzten gorabeherak esplikatzeko. Hainbat auzokide eta LAB eta FSU sindikatuetako kideak agertu dira haiekin, baina eragile politiko eta sozial andanaren babesa eskuratu dute azken asteetan, hala nola Elkartasunak Eraiki elkarte sarearena. Mauriziaren proiektua goraipatu zuten agiri batean, lehengo astean, eta, okupatzaileen hitzetan, Jean Rene Etxegarai Baionako auzapezari idatzi berri diote negoziazioek irauten duten bitartean kanporatzea oztopa dezala eskatzeko.

#Maurizia "Proposamena onartu ala kanpora" hori da @JreneEtchegaray-k proposatzen dien negoziaketa Hodeiren hitzetan @berria pic.twitter.com/85FU2l71hj

— Ekhi Erremundegi (@EkhiErremundegi) June 8, 2023

Maiatzaren 16an jakinarazi zuten Baionako Santa Ursula karrikako eraikin bat okupatzen ari direla, bizitegien arazoari erantzun eta denei irekitako espazio soziokultural bat proposatzeko. Ekintzaileen hitzetan, 2015etik hutsa da egoitza. EPFL Ipar Euskal Herriko Lurraren Erakunde Publikoak erosiak ditu lurrak, Euskal Hirigune Elkargoarentzat. Hala, Etxegarairekin hitz egiten hasi dira, alokairu kontratu bat izenpetu ahal izateko. Behin eta berriz adierazi dute asmoa dutela erakunde publikoek Aturri bazterrerako duten proiektua gauzatu bitartean bertan gelditzeko. «Ez ditugu obrak oztopatuko», errepikatu dute gaur ere. «Alokairu kontratu bat izenpetzeak aseguru bat hartzeko aukera emanen liguke, eta horrek bi aldeak babestuko lituzke».

Astelehenean elkartu ziren Baionako auzapezarekin, eta hark hangarra erabiltzea proposatu ziela esplikatu dute. Herriko etxeak bere gain hartuko lituzke obrak, eta gauzatu bitartean lekuak hustu beharko lituzkete, zehaztu gabeko epe batentzat. Uko egin diote gazteek; besteak beste, ez diolako bizitegi arazoari erantzuten. «Gure maneran parte hartzen dugu etxebizitzaren krisi honi eta haren ondorioei buruzko eztabaidan... Eta herriko etxeak bestak antolatzeko areto bat proposatzen digu», deitoratu dute. «Guk ura eskatu eta elektrizitatea emanen baligute bezala da».

Berriki, beste jabego baten proposamena ere egin diete, baina hor ere ez litzateke aski leku gaur egun Maurizian daudenak aterpetzeko, eta ez da zehaztua zenbat denborarako izanen litzatekeen. Bederatzi pertsona bizi dira gaur egun eraikin okupatuan, eta baieztatu dute eskaera gehiago ere eskuratu dituztela. Gazteen hitzetan, Etxegaraik erran die ezin dizkiela eraikinean diren bizitegiak utzi, duela hamar urte bertan bizi ziren auzokideak kanporatu zituztelako.

Helegite gatazka

Baionako Auzitegiak Maurizia husteko agindua emana du, baina horren kontrako helegitea jarri du gazteen abokatuak. Izan ere, ordenantza bidez hartu zuen erabakia justiziak, ekintzaileei kasua defendatzeko aukerarik eman gabe. Okupatzaileen nortasuna ezezaguna zela argudiatu zuten horretarako. Alta, okupazioa iragarri zuten egunean Baionako komisarian deklaratu zuten beren borondatez, izen-abizenak emanda. Astelehenean aztertuko dute gazteek ezarritako helegitea, baina gaur goizean jakin dute eraikinaren jabeek ere beste helegite bat jarri dutela haienaren kontra.

Haserre mintzatu dira: «Etxegarai eta EPFL, karrikara botako gaituzue geure burua defendatzen utzi gabe? Indar armatuak bidaliko dizkiguzue ezin dituzuelako egiazko neurriak hartu? Jakin ezazue arazoa gibelatzen ari zaretela». Salatu dute azken hilabetean presio anitz jasan dutela. «Elkarrizketarako prest izan gara hastapenetik; herriko etxearekin izan dugun harremanak eraikitzailea iduri zuen, baina orain traizio egin digutela sentitzen dugu, egoerak hartu duen bideagatik».

Argi adierazi dute: kanporatzera heldu badira ez dutela erresistentziarik emanen. «Bortizkeria ez da gurea. Bortizkeria da 10.000 metro koadroko eraikin bat hutsik atxikitzea Baiona erdian». Abisua ere eman dute: «Kanporatuak bagara, okupazio dinamika bat abiatuko dugu. Hemendik atera bezain laster beste eraikin publiko batean sartuko gara».