Enpresak
Euskal enpresek ezkor begiratzen diote hirugarren hiruhilekoari
%23,7k soilik espero dute salmentak hobetzea. Hala ere, enplegua egonkor mantenduko dela uste dute
Enpresek tentu handiz begiratzen diote hirugarren hiruhilekoari. Soilik %23,7k espero dute fakturazioa hobetzea, eta %24,6k uste dute okerrera egingo duela. Laboral Kutxako Ikerketa Sailak inkestatutako 215 konpainiek planteatzen duten egoera bat dator BPGaren azken neurketek jardueretarako islatzen duten dezelerazioarekin.
Hala, finantza erakundearen konfiantza indizea 49an kokatu da; hau da, aurreko hiruhilekoan baino 3,8 puntu beherago. Inkestaren egileen arabera, 50etik beherako balioa izateak esan nahi du ekonomia uzkurtze eremuan dagoela. Horrek berretsi egingo luke 2023ko hirugarren hiruhilekoari begira enpresek ekonomiaren bilakaerari buruz duten ikuspegi negatiboa.
Azterketak neurtu dituen parametro guztiek okertze txiki bat aurreikusten dute. Adibidez, enpresen %13,7k bakarrik uste dute ingurune ekonomikoak hobera egingo duela, eta %60,7k uste dute berdin jarraituko duela.
Inbertsioak, geldirik
Fakturazioari dagokionez, ezkorragoak dira. Zehazki, %24,6k uste dute okerrera egingo duela, aurreko hiruhilekoan halako bik, eta %51,7k uste dute antzekoa izango dela.
Bereziki lehengai eta energien prezioez kezkatuta agertu dira enpresak, baina aurreko hiruhilekoetan baino moderatuagoa da beldur hori. %19k uste dute garestitu egingo direla, eta %69,2k, berriz, bere horretan eutsiko dietela.
Laboral Kutxak azpimarratu du enpresek ez dutela inbertsiorik egiteko asmorik; soilik %12,8k espero dute handitzea. Europako funtsei dagokienez, %13,5 baino ez dira inplikatuta sentitzen finantzaketa hori lortu nahi duen proiekturen batean.
Enpleguari dagokionez, enpresen % 76,8k uste dute hirugarren hiruhilekoan mantendu egingo dela, eta %8,5ek, murriztu egingo dela.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
