Urteotako borrokaren eta batez ere atzo arratsaldeko eta gaueko hamabi orduko negoziazioen ostean, EB Europako Batasuneko estatu kideetako Barne ministroek migrazio eta asilo legeak erreformatzea lortu dute. Akordioa «historikoa» da, Alemaniako Barne ministro Nancy Faeserren arabera; besteak beste, talde komunitarioaren gairik zailenetako batean ados jarri baitira azkenean, nahiz eta babesa aho batezkoa ez izan. Neurri nagusiak hauek dira: EBko estatu kideek kontinentera iristen diren 30.000 asilo eskatzaile banatu beharko dituzte urtero euren artean —biztanleriaren eta barne produktu gordinaren arabera—, eta ukatzen duten iheslari bakoitzeko 20.000 euro ordaindu beharko dituzte. Iaz, 180.000 migratzaile iritsi ziren talde komunitarioko herrialdeetara.
Praktikan, akordio horrek aldatu egingo ditu asilo eskatzaileak mugetan prozesatzeko eta talde komunitarioko estatuetan kokatzeko moduak. Eta helburutzat dauka, Suediako Migrazio ministro Maria Malmer Stenergardek atzoko bilkuran azaldu zuenez —herrialde horrek du EBko Kontseiluaren presidentetza hilabete amaiera arte—, talde komunitarioko estatu kideen «elkartasunaren eta erantzukizunen arteko oreka» lortzea.
Kuotaren eta zigorren inguruan ados jartzeaz gain, EBko Barne ministroek negoziatu zuten estatu kideek erabakiko dutela beste herrialdeen artean zein den «segurua» asiloa ukatu zaien migratzaileak hara bidaltzeko. Eta, horretarako, estatuek frogatu beharko dute iheslariek «konexio bat» dutela herrialde horrekin; hori bai, herrialde bakoitzak erabakiko du «konexio» horrek zehazki zer esan nahi duen. Hortaz, afera horretan, badirudi gobernuek malgutasun handia izango dutela migratzaileak EBtik kanpoko zer herrialdetara bidali erabakitzeko.
Italiaren baldintza
Konexioaren afera hori malgutzea zen Italiaren baldintzetako bat akordioari baiezkoa emateko —77.000 asilo eskari jaso zituen iaz—. Matteo Piantedosi herrialde horretako Barne ministroa, hortaz, pozik agertu zen atzo gauean: «Zerbaiten hasiera da».
Aldiz, Hungariak eta Poloniak kontra bozkatu zuten —Varsoviak gaur esan du ez duela onartuko kuotarik «inposatzea»—, eta Bulgaria, Eslovakia, Lituania eta Malta abstenitu egin ziren; Alemaniak, Luxenburgok, Irlandako Errepublikak eta Portugalek alde bozkatu zuten, baina laurek esan dute aldaketa gehiago sustatzen saiatuko direla, lege berrietatik kanpo gera daitezen haurrak eta bakarrik iritsitako adingabeak.
Plan berriak martxan jartzeko, Europako Batzordeko Barne komisario Ylva Johanssonek atzo azaldu zuen mila milioi euroko funts bat eratuko dutela estatu kideentzat: «Elkarrekin ez bagaude, denok galtzen dugu».
