Presoak
Joseba Borde presoari hirugarren gradua kentzea gaitzetsi dute
Fiskaltzak aurkeztutako helegiteak espetxera itzultzera behartu duela-eta, protesta egin dute Ugaon, bere segurtasun juridiko eza salatzeko.
Joseba Borde presoari hirugarren gradua kendu diotela salatzeko bi manifestazio egin dira Bizkaian gaur. Bata, 19:30ean atera da, Bilboko Santutxu auzoko Egunkaria plazatik; bestea, Ugaoko Herriko plazatik.
Borderi hirugarren gradua emana zioten, eta Espetxe Zaintzak onartua zuen zigorraren bi herenak beteta zituela. Alta, fiskaltzak helegitea jarri zuen eta, Auzitegi Gorenak ezarri berri duen doktrina jarraituz, espetxe zaintzako epaitegi zentralaren erabakia etorri bitartean bigarren gradura itzuli da.
Egoera hori salatzeko egin dituzte gaurko manifestazioak. «Berriz ere jaso nahi ez genuen notizia iritsi da», adierazi dute Ugaon irakurri den komunikatuan. Gogora ekarri dute espetxe zaintzako epaitegiaren erabakia etorri bitartean hilabeteak pasatu daitezkeela, eta berriro espetxean egon beharko duela Bordek. «Auzitegi Gorenaren doktrina aplikatu izanak salbuespen egoera eta segurtasun juridiko eza sortzen ditu», gaitzetsi dute.
Gogora ekarri dute Bordek 64 urte dituela eta koloneko gaixotasun larri bat duela. Legediaren arabera, etxean egon beharko lukeela eta haren eskubidea urratzen ari direla kritikatu dute irmo. «Nahikoa da, hau ez da justizia», esan dute. Gaineratu dute Borderena ez dela kasu bakarra, eta presoen etxeratzeko prozesuari oztopoak jartzen ari zaizkiola salatu dute.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
