Algortako mugimendu feministak jaietan izandako bi eraso matxista salatu ditu gaur arratsaldean egin duten protestan. «Berriz esango dugu, argi eta ozen: gutako baten aurkako erasoa denon aurkako erasoa da!», egin dute aldarri. Horregatik gaude hemen gaur. Ez diogulako etsiko eraso oro kalean salatzeari, ikusarazteari, borrokatzeari, inork isildu nahi baldin bagaitu ere».
Eusko Jaurlaritzako Segurtasun Sailak jakinarazi duenez, Ertzaintzak gizon bat atxilotu du Getxon (Bizkaia), Algortako festetan 17 urteko neska bati sexu eraso bat egiteagatik bart gauean.
Mugimendu feministako kideen hitzetan, eraso eta erasotzaile gehiegi dago «kontu bakana balitz bezala» jokatzen jarraitzeko. «Botere eta pribilegio kontua baita hau, emakumeen aurkako gerra, azken finean», adierazi dute. Horregatik, herritarrak deitu dituzte horrelakoak kalean salatzera eta mobilizatzera, «gizarte osoaren gaitza» delako.
Gizonei ere egin diete dei «[emakumeen] aurkako indarkeria eta eraso guztiak desaktibatzen inplikatzeko». Azpimarratu dute gizonek dutela «giltza» eraso asko gelditzeko, «zuen ahotsak altxatzeko eta zuen ekintzak antolatzeko bortxaketaren kulturaren aurka».
