Itzuli da Urdaibai. Eta nola, gainera. Joan den asteburua txarra izan zen bermeotarrentzat, baina oraindik ere indartsu dabiltzala erakutsi dute asteburu honetan Zarautzen (Gipuzkoa). Larunbateko eta igandeko jardunaldietan onenak izan dira, eta sailkapen nagusian jauzi handia egin dute. Urdaibaik Zarauzko Ikurrina irabazten duen bosgarren aldia da.
Ikusi gehiago:Arraun Lagunakek irabazi du Euskotren Liga
Atzoko jardunaldiaren ostean, Orio zen bizkaitarrekin garaipenaren lehian ibil zitekeen bakarra. Itxaropenak, ordea, gutxi iraun die oriotarrei: bigarren ziabogarako 14 segundorena zen bien arteko tartea. Atzo bikain ibili ziren, baina gaur ez dute estropada ona egin, eta zortzigarren izan dira.
Eguneko garaipenerako lehian, Zierbena egon da Urdaibairengandik gertuen, bigarren txandako irabazlea. Amaieran sei segundorena izan da tartea. Hirugarren ziabogan denbora hobea zuten galipoek.
Hirugarren posturako lehian Donostiarra eta Hondarribia ibili dira, eta, azkenean, Torrekua II izan da garaile gutxigatik.
Asteburuko emaitzen ostean, Urdaibaik berriz ere tartea lortu du sailkapen nagusian. Orain, 164 puntu ditu, eta bederatzi ateratzen dizkie Hondarribiari eta Zierbenari. Datorren asteburuan, Ondarroan (Bizkaia) eta Getarian (Gipuzkoa) izango da Eusko Label Liga.
