Ziarreta: "Mugimendu subiranista erraldoia sortu beharko litzateke"

Iñigo Urkullu EAJko presidenteak igandean jakinarazi zuen laugarrenez segidan Juan Jose Ibarretxe proposatuko diela euren afiliatuei Eusko Jaurlaritzako lehendakarigai izateko, eta jendea EAra begira hasi da, atzera koalizioa osa dezaketela-eta. Unai Ziarreta EAko lehendakariak ez du aukera hori baztertzen, gaur Euskadi Irratian esan duenez, baina aukera bakarra hori ez dela gaineratu du. "Mugimendu subiranista erraldoia sortu beharko litzateke", esan du. "Oso pozik gaude Jaurlaritzan [EAJ eta EBrekin]. Gauzak oso ondo egin ditugu, eta Ibarretxek inplikazio handia erakutsi du herri hau aurrera eramateko. Nola ez, hurrengo hauteskundeei begira EAJrekin hitz egingo dugu, baina beste aukera batzuk ere badaude". Gaur =iEl Pais=i-ek argitaratu du Batasunarekin eta Aralarrekin egotekoa dela EA, eta Ziarretak esan du hala dela. Batasunarekin lankidetzan aritzeko, ETAk indarkeria behin betiko bukatzeko konpromisoa agertu behar duela dio EAko buruak. EAEko bozei begira "otsailetik-edo" lanean ari direla adierazi du -2009ko martxoan izango dira Arabako, Bizkaiko eta Gipuzkoako hauteskundeak-, baina ez zaiola iruditzen orain balizko koalizioen kontua denik lehentasuna. "Legealdia bukatu behar da, erabaki eskubidearen gaia hor dago... Alderdi barruan lasai-lasai ari gara hizketan hauteskundeez, eta ikusiko dugu gure jendeak zer esaten duen". "Erabaki eskubidea eztabaidaren erdian kokatu" dutela-eta, gustura dago EA, eta bide horretan segitu behar dela iritzi dio alderdiko lehendakariak. "Ate bat ixten badigute -Espainiako Auzitegi Konstituzionalak bezala-, beste bat bat irekitzen saiatuko gara". Bide horretan garrantzitsua iruditzen zaio indarrak metatzea.