Albistea entzun

atxiloketak

34 gazte atxilotu dituzte bart Hego Euskal Herrian, Segirekin lotuta

Gazte mugimenduaren kontrako operazio zabala egin dute Espainiako Poliziak eta Guardia Zibilak Araban, Bizkaian, Gipuzkoan eta Nafarroan, Grande Marlaska epaileak aginduta. Gutxienez, beste zazpi gazteren bila dabiltza. 90 bat miaketa dituzte, halaber. Polizia iturrien arabera, gazte erakundea "berrosatzen" ari ziren. AAMk ohartarazia zuen operazio zabalen bat egingo zutela.
Guardia zibilak eta ertzainak, gaur, Lekeition.
Guardia zibilak eta ertzainak, gaur, Lekeition. / Lea-Artibai eta Mutrikuko Hitza

Berria -

2009ko azaroak 24
Polizia operazio zabala egin dute gaur goizeko bostetatik aurrera Hego Euskal Herrian gazte mugimenduaren kontra, Segi gazte erakundearekin lotuta. Fernando Grande Marlaska Espainiako Auzitegi Nazionaleko epaileak zuzendu du -Donostian egon da- eta =l34 gazte atzeman==http://www.berria.info/albisteak/37571/ATXILOTU_ZERRENDA.htm=l dituzte Araban, Bizkaian, Gipuzkoan eta Nafarroan Espainiako Poliziak eta Guardia Zibilak. Operazioak zabalik jarraitzen duela diote eta, gutxienez, beste zazpi gazteren bila dabiltza. Madrilera bidean dituzte 34 gazteak. 90 bat miaketa egin dituzte poliziek, euren jakinarazi dutenez: etxeak, gaztetxeak, elkarteak... Poliziak esan du dokumentazioa, Segiren eta ETAren argitalpenak, lehergailuak egiteko materiala, sobreetan sei mila euro eta abar aurkitu dituztela. ETArekin lotzen dute Segi poliziek eta, horien arabera, gazte haiek "berrosatzen" ari ziren. "Horretaz informazioa lortzea da helburuetako bat", diote Espainiako berri agentziek, polizia iturriak aipatuta. Espainiako Gobernuko Barne Sailak dio "ETAren harrobiaren buruzagitza desegin" dutela, "Segiren egitura klandestinoa ia osorik" ere bai -haien arabera, herrialde eta eskualde arduradunak atzeman dituzte-, eta "kolpe gogorra" eman dutela operazioarekin. Haren arabera, bi talde zituzten osatuta: Gazte Independentistak eta Segi klandestinoa. Espainiako Auzitegi Gorenak "talde terrorista" gisa jo zuen Segi =l2007ko urtarrilaren 19an==http://www.berria.info/albisteak/18750/Jarrai_Haika_eta_Segi_talde_terrorista_direla_erabaki_du_Auzitegi_Gorenak.htm=l -bere garaiko Jarrai eta Haika ere bai-. Hego Euskal Herrian, ordea, Segik ez du jendaurreko ekitaldirik egin urteetan; Ipar Euskal Herrian bai, ez delako ilegala Frantziako Errepublikan. Amnistiaren Aldeko Mugimenduak (AAM) lehengo asteazkenean ohartarazi zuen Euskal Herrian polizia operazio zabalen bat prestatzen ari zirela. "Datozen egunetan burutuko litzatekeen polizia operazio baten informazioa jakin du AAMk", zioen.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.