Albistea entzun

Jon Anza auzia

Anza Espainiako segurtasun indarrek hil zutela diotenen kontrako lege neurriak iragarri ditu Rubalcabak

"Gaur bertan hasiko ditut lege ekimenak Estatuko Segurtasun Indarren ohorearen defentsan", esan du Espainiako Barne ministroak RNE irratian egin dioten elkarrizketan. Donostiako manifestazio ondorengo adierazpenak aipatu ditu zeharka.

Berria -

2010eko martxoak 16
Jon Anza ETAko militante desagertua Espainiako segurtasun indarrek hil zutela jendaurrean ziurtatu dutenen kontra neurri legalak hartuko ditu Espainiako Gobernuak, Estatuko Abokatuaren bidez. Hala iragarri du Alfredo Perez Rubalcaba Espainiako Barne ministroak RNE Espainiako irrati publikoan egin dioten elkarrizketan. "Inolako frogarik gabe iraindu eta kalumniatu dute. Denbora asko daramagu laidoak, irainak eta kalumniak jasaten, baina aski da. Gaur bertan hasiko ditut Estatuko Segurtasun Indarren ohorea defendatzeko lege ekimenak", azpimarratu du Anzaren desagertze eta heriotzaren harira egin diren adierazpenei buruz galdetu diotenean. Anza Poliziak hil zuela "ETAk asmatutako gezurra" dela iritzi dio Rubalcabak, eta "astakeria" dela jendaurrean akusazi horiek jaurtitzea. Ildo horretatik, zehaztu du "alderdi demokratikoek" agertutako zalantzek ez dutela arduratzen, baizik eta "norbaitek mikrofono bat hartu eta esatek Anza jauna Poliziak edo Guardia Zibilak atxilotu duela, torturatu eta lurperatu duela". Finean, zeharka bada ere, igandean Donostian egin zen manifestazio ondorengo adierazpenak aipatu ditu, eta haiek jarri ditu jomugan. Areago, "hemeroteken errepasoa" egingo duela iragarri du. Anzaren inguruko ikerketan "akatsak" egon daitezekeela onartu du Rubalcabak, eta guztia argitzeraino lanean jarraituko dutela ziurtatu. Hala ere, "Estatu demokratikoak legearen arabera" jokatzen duela azpimarratu du.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...