Serbiako Poliziak Ratko Mladic general ohia atxilotu du gaur goizean, Belgraden. Hasiera batean ezin izan dute bere nortasuna baieztatu, Milorad Komadic izena hartua zuelako, baina Boris Tadic Serbiako presidenteak atxilotutakoa Mladic dela baieztatu du.
Mladic Bosniako serbiarren buru izan zen Balkaneetako Gerran, eta gerra krimenak leporatzen zaizkio. Zehazki Srebrenicako 8.000 musulmanen hilketarekin zer ikusia duela uste da eta Sarajevoko setioan parte hartu zuela. Orain dela hamabost urtetik dago Mladic ihes eginda. Bosnian gerra 1992 eta 1995 urteak bitartean izan zen; 100.000 pertsona hil ziren eta 1,8 milioik ihes egin behar izan zuten.
Europako Parlamentuko presidente Jerzy Buzekek esan du atxiloketa horrek Serbia Europako Batasunean sartzen lagunduko duela. Serbiako agintariak zoriondu ditu atxiloketagatik. Catherine Ashton Europako Batasuneko Kanpo Harremanetarako ordezkariak eskatu du Hagara eraman eta Nazioarteko Zigor Auzitegiaren esku uzteko.
Goran Hadzic atxilotzeko esperantza
Erreakzioak berehala izan dira, eta NATOko idazkari nagusi Anders Fogh Rasmussenek esan du Bosnian justizia egiteko aukera eskainiko duela atxiloketak. Amnsty Internationalek ere zoriondu egin du Serbia, eta modu berean Goran Hadzic serbiar-kroaziarra atxilotuko dutelako itxaropena agertu du.
Hain zuzen, Hadzic da Nazioarteko Zigor Auzitegiaren zerrendan atxilotzea falta den bakarra. Kroaziako serbiarren buru izan zen, eta beste gauza batzuen artean Krajinatik serbiarrak ez ziren herritarrak botatzea, hilketa, pertsekuzioa, tortura eta gizatasunik gabeko tratua leporatzen diote.
