Guggenheimek 3,5 milioi euroko eskultura bat erosi du

Anish Kapoor Indiako artistaren Zuhaitz handia eta begia izeneko eskultura erosi du Bilboko Guggenheim museoak, bere funts propiotarako. Altzairu herdoilgaitz islatzaileiko 80 esferek osatzen dute erosi berri duten eskulturak. 3,5 milioi euro ordaindu ditu museoak Kapooren eskulturagatik.

2010eko martxotik dago Kapooren eskultura Guggenheim museoan, eraikinaren atzean dagoen urmaelean. Baina berriki erosi dute behin betirako. Iazko ekainean hasi zuen museoak eskultura erosteko prozesua.

Datozen hilabeteetan eskultura bere tokitik esmuntatuko dute, idulki sendoago bat jartzeko. Artistak tratamendu berezia emango dio bere obrari, hala, Bilboko ingurumen egoerari aurre egin ahal izateko.

Sei behin behineko erakusketa 2012rako

Hurrengo urterako sei behin behineko erakusketa antolatzeko asmoa du Guggenheim museoak, atzo plazaraturiko prentsa-ohar baten bitartez jakitera eman duenez.

Urte hasieran La Caixa eta MACBA fundazioen bildumako obra esanguratsuenak aurkeztuko dituzte. Arte garaikideko 4.450 obra inguru ditu bilduma horrek, eta 80ko hamarkadako Alemaniako eta AEBetako arteko ibilbidea jorratzen du.

Udaberrian David Hockney artistaren 150 bat lan aurkeztuko dituzte. Formatu handiko margolanak egin ohi ditu Hockeneyk, eta Yorkshire ekialdeko paisaietan inspiratzen da. Aldi berean Pierre Bonnard izeneko erakusketa aurkeztuko dute, artista europarraren 60 bat obren bidez.

Uda Cristina Garcia Rodero argazkilariaren Zeruaren eta lurraren artean erakusketarekin hasiko du Guggenheim museoak. Bere ibilbideko azken hogei urteetako argazki esanguratsuenak jarriko dituzte ikusgai.

Udazkenean Bauhaus diziplinaren  eta 60ko eta 70ko hamarkadetako Claes Oldenburg artistaren erakusketa bana aurkeztuko dituzte.