Albistea entzun

Ukraina

Ofizialki Krimea dagoeneko Errusia da

Gaur bertan berretsi du Errusiako Senatuak Krimea eta Sebastopol Errusiara batzeko ituna, eta ordu gutxitara etorri da presidentearen aldarrikapena.

Putin, Barne ministerioak gaur egin duen bileran
Putin, Barne ministerioak gaur egin duen bileran / Mikhail Klimentyef/EFE

Mikel Rodriguez -

2014ko martxoak 21 11:55

Ordu gutxi behar izan ditu Errusiako presidente Vladimir Putinek Krimea eta Sebastopol Errusiara batzeko legeak aldarrikatzeko. Izan ere, gaur goizean onartu du senatuak aho batez ituna: 155 senatariek eman dute aldeko botoa. Hiruak elkartzeko beharrezkoa zen prozedura parlamentarioa amaitu da senatuaren berrespenarekin, eta presidenteak legeak aldarrikatzea besterik ez zen falta batzea gauzatzeko.

Atzo jakinarazi zuen Sergei Lavrov Errusiako Atzerri ministroak litekeena zela asteon formalizatzea juridikoki Krimearen, Sebastopolen eta Errusiaren batzea. Eta hala izan da azkenean. Erreferenduma igandean egin zuten Krimean, eta astebete baino gutxiagoko tartean batu da Errusiara.

Zigorren mehatxua

"Ezin da berrikusi". Erantzun horixe eman zion atzo Lavrovek John Kerry AEBetako Estatu idazkariari, Krimea Errusiari batzeko prozesuari buruz. Errusiako Dumak (parlamentuak) atzo eman zion oniritzia Vladimir Putin presidenteak eta Krimeako eta Sebastopoleko Udaleko agintariek sinatutako hitzarmenari, eta gaur Federazioko Kontseiluaren (senatuaren) baiezkoak bukatzekoa du prozedura formala. AEBek Errusiako ordezkari gehiagori ezarriko dizkiete zigorrak, eta, EB Europako Batasunarekin batera, zigor ekonomikoen mehatxua errepikatu dute, baina horrek ez du Errusia kikildu. Ukrainako Radak (parlamentuak) bat egitea ez onartzeko eskatu dio nazioarteari, eta adierazi du "Krimea okupatzaileetatik askatzeko borroka» ez dela «inoiz bukatuko". Errusiak, ordea, jadanik ongi lotuta dauka penintsula.

Dumak tramitea ezusterik gabe bete du, eta adostasuna erabatekoa izan da: 445 diputatu Krimea eta Sebastopol Errusiako Federazioko 84. eta 85. lurraldeak bihurtzearen alde, eta bakarra kontra. Lavrov Atzerri ministroak giza eskubideen izenean justifikatu du bat egitea. "Herritar guztien eskubide berdintasuna berma dezaketen herrialdeek lurralde batasuna babestuta edukiko dute". Baina, Lavroven iritziz, ez da hori Ukrainaren kasua. "Kieven kolpea gertatu ondotik, Krimeako herritarren eskubideak are gehiago murrizteko ekintzak gertatu ziren".

"Zabaltzeko doktrina"

Ukrainako Radak, ordea, nazioarteko legedia urratzea egotzi dio Errusiari, eta uste du Kremlinak "mundu errusiarra zabaltzeko doktrina" paratu duela indarrean. Mendebaldearen babesa da Ukrainako gobernu berriak Errusiari aurre egiteko duen aukera bakarra, baina babes horren eraginkortasuna aski mugatua izan da orain arte, eta gauzak anitz aldatu beharko lirateke Errusiaren asmoei trabaren bat sortzeko.

Barack Obama AEBetako presidenteak agerraldi bat egin zuen atzo, zigor gehiagoren berri emateko. Gogor agertu nahi izan zuen. "Nazioek ez dituzte mugak nahieran marrazten, bakarrik boteretsuagoak direlako". Ezarritako zigorren bigarren saila ere, ordea, eragin mugatukoa izanen da; "Putinen barne zirkulua" osatzen dutenak gehitu dizkiote zerrenda beltzari —bortz lagun, horien artean Sergei Ivanov kabinete burua—, eta erakunde bat: Errusia Bankua. Guztiek ezinen dituzte transakzioak dolarretan egin, ezinen dira AEBetan sartu, AEBetan ondasunik badute izoztu eginen dizkiete eta ezinen dute eduki AEBekin merkataritza harremanik ere.

Hala ere, Obamak iragarritakoak ez du askorik arduratu Errusia, eta erantzun berbera eman dio, AEBetako zenbait ordezkari zigortuta. Horien artean daude Kongresuko bi ganberen buruak —John Boehner errepublikanoa eta Harry Reid demokrata— eta John McCain senatari errepublikanoa —2008an presidentegai izandakoa—. McCainen izena nabarmentzekoa da, Errusiaren aurkako lobby lanean buru-belarri murgildu baita azken urteotan. Kieveko Independentzia plazatik igaro zen abenduan, Viktor Janukovitx presidentearen aurkako manifestariei babesa agertzeko. Baina ez hori bakarrik; iaz Sirian izan zen matxinoei sostengua emateko, eta arma kimikoak suntsitzeko Etxe Zuriak eta Kremlinak egindako akordioa kritikatu zuen, AEBen "ahulezia" erakusten zuelakoan.

EBren mugak

AEBak baino posizio ahulagoan dago EB, Errusiaren gasarekiko dependentzia eta harreman ekonomikoak direla eta. Alemania eta Erresuma Batuak dute interes gehien, baina, hala ere, zigor ekonomikoak aztertuko dituztela adierazi zuten atzo EBko estatuburuen eta gobernuburuen goi bileran. Martin Schulz Europako Parlamentuko presidentearen solasek argi utzi dute EBk mugak dauzkala Errusiari presio egiteko. "Ez genuke akordioak hausteraino joan beharko. Errusiak bere modura ikusten ditu gauzak. Urrutiago badoaz, zigor ekonomikoak aztertu beharko ditugu, baina ezin gara irteerako arrastora itzuli".

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Hainbat sudandar, herrialdeko armadaren aurkako protestan, ekainaren 3an, Khartum hiriburuan. ©ELA YOKES / EFE

Sudango krisi politikoa gainditzeko akordioa sinatu dute junta militarrak eta oposizioak

Mikel O. Iribar

Hitzarmenaren helburuak dira «gobernu zibila» osatzea eta bi urteko epean bozak egitea. Parlamentuko eserlekuen %40 emakumeek beteko dituzte. Estatuko hainbat eragilek itunaren aurkako protestara deitu dute.

Emakume bat burua estalita, atzo, Teherango kaleetan. ©STRINGER / EFE

Mobilizazioei eusteko eskatu dute Iranen, Moralaren Polizia desegin dutela zabaldu ostean

Edu Lartzanguren - Maddi Iztueta Olano

Datozen hiru egunetan manifestazioak eta grebak egitera deitu du oposizioak. Gobernuak, ordea, ukatu egin du Polizia taldea sakabanatu izana.

Macron eta Putin prentsaren aurrean, joan den otsailaren 7an Moskun egindako bileraren ondoren. ©EFE

Macronek eskatu du Errusiaren segurtasun bermeak aintzat hartzeko

Igor Susaeta

Frantziako presidenteak elkarrizketa batean adierazi duenez, Putinek gerraren amaiera negoziatzea onartzen baldin badu, aintzat hartu behar da NATO «bere ateetaraino heltzeko duen beldurra»

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...