Albistea entzun

galdeketa

Etxarri Aranatzen %94 agertu da independentziaren alde, %42ko parte hartzearekin

Euskal Herriaren independentziari buruzko lehendabiziko herri galdeketa izan da. 851 boto egon dira. Bai: 804. Ez: 18. Txuriak: 26. Baliogabeak: 3. "Garrantzitsuena, ariketa izan da", esan du Manu Gomez antolakuntza taldeko kideak. Galdeketan normaltasunez burutu da, behatzaileen arabera.

Manu Gomez antolatzaile taldeko kidea emaitzen berri ematen.
Manu Gomez antolatzaile taldeko kidea emaitzen berri ematen.

Enekoitz Esnaola, Maialen Unanue (Etxarri Aranatz) -

2014ko apirilak 14

Egin da Euskal Herriaren independentziari buruzko lehen herri galdeketa. Etxarri Aranatzen, Nafarroan. Antolatzaileen kalkuluen arabera 1.990 pertsonek zuten botoa emateko aukera —ez zuten udal erroldarik—. 851 boto izan dira. Beraz, %42,76ko parte hartzea izan da. Aldeko botoak, %94,47koak. Nahi duzu Euskal Herria independente bateko herritarra izan? izan da galdera.

Ezezko botoak %2,11 izan dira, txuriak %3,05, baliogabeak, %0,35. Gaueko bederatzi eta erdiak aldera jakinarazi ditu antolatzaile taldeak emaitzak, galdeketako zazpi behatzaileak ondoan zirela —Euskal Herriko lau eta nazioarteko hiru—.

Normaltasuna egunean zehar

"Goizean goizetik normaltasunez egin da galdeketa, eta herritarrok aparteko gorabeherarik gabe eman dugu bozka". Hala adierazi du Manu Gomez A13 ekimeneko kideak eguerdiko prentsaurrekoan. Ordurako, botoa ematera deitutakoen %25ak eman dute.

Baina Gomezek argi zeukan datuak ez zirela garrantzitsuenak: "Hemen garrantzitsuena ariketa demokratikoa izan da". Dantzariak, herri kirolak, musika... Festa bikoitza izan da Etxarri Aranatzen. "Jai giro ederra izan da".

Anna Arque Kataluniako galdeketen taldekide eta Etxarrikoaren ikuskatzaileetakoak herritarrak zoriondu ditu, bai antolaketagatik, bai herriko giroagatik. Arquek ere esan du ez dela aparteko gertaerarik edo gorabeherarik izan.

Inaki Irazabalbeitia europarlamentari eta ikuskatzaileak adierazi du "Europako Batasuneko herri eta herritarrek beren erabakitzeko eskubidea gauzatu ahal izateko minimo komun batzuk" jarri beharko liratekeela. "Ez da bidezkoa eskoziarrek bozkatu ahal izatea eta, aldi berean, Espainiak eskubide hori ukatzea Euskal Herriari. EBk tresnak ahalbidetu behar lituzke herritarrek euren erabakitzeko eskubidea gauzatu ahal izateko".

Azkenean zortzi behatzaile beharrean, zazpi izan dira, Jan Van Esbroeck belgikarrak ezin izan baitu agertu, arazo pertsonalak tarteko. 

Botoa ematen aurrena

Nati Jauregi Ezkurdia etxarriarra izan da bozka ematen lehena. Galdeketa "ederra eta beharrezkoa" dela iritzi dio Jauregik. "Barruak dantzan" zituen Jauregik bozka ematerako unean, egun garrantzitsua denaren seinale.

30 hedabide kreditatuta

Independentziari buruz Euskal Herrian egin den lehenengo galdeketak ikusmin handia sortu du. Euskal Herriko zein nazioarteko medioak dira bertan: 30 hedabide inguru, eta 40 kazetaritik gora. Besteak beste, Flandriakoak,  Alemaniakoak eta Kataluniako TV3 izan dira.

Bideoa: Inaki Irazabalbeitia behatzailea, goizean

Bideoa: Joxi Bakaikoa, Etxarri Aranazko alkatea, botoa eman aurretik.

Hilabetetako prozesua

Hilabeteak prestatze lanetan ibili ondoren egin dute Etxarri Aranatzen galdeketa. Demokraziaren festa" izan da, antolatzaileek diotenez.

Iaz saiatu ziren han herri galdeketa egiten, udalak mozio bat onartu ondotik, baina Nafarroako Auzitegiak baliogabetu egin zuen kontsulta, hori antolatzea udalaren eskumena ez dela argudiatuta. Oraingo saioan udala ez da sartu ezertarako. Herri plataforma bat izan da antolatzailea.

Goizeko bederatzietan ireki dituzte bozkalekuak, herriko plazako lokal pribatu batean. Gaueko bederatzi eta erdiak aldera jakin da emaitza.

Egitarau zabala prestatu dute egun osorako, eta jende asko batu da herriko erdigunean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zazpi alkateak, gaur goizeko agerraldian. ©EH BILDU

EH Bilduko alkateek txosten bat eskatuko dute Ingurumen Administrazioko Legeak udalen eskumenetan izango duen eraginaz

Jone Arruabarrena

EAJ eta PSEri leporatu diete «demokraziaren kontrako erasoa» dela legeari egin nahi dioten aldaketa, eta udalen eskumenak urratzea dakarrela. Hamabost eguneko epean txostena aurkezteko galdegin diote EUDELi.

Bernat Etxepare lizeoko ikasleen protesta, Oier Oaren alde ©Guillaume Fauveau

Oier Oari ez diote lurralde debekua kenduko, eta familiatik banatua segitu beharko du

Ekhi Erremundegi Beloki

Gaur eman du erabakia Parisko Zigor Auzitegiak. Otsailean epaituko dute, Baionan, lurralde debekua urratzea leporatuta.

Llotja de Marreko alderdien ordezkariak, iaz, Espainiako Kongresuan. ©Javier Lizón / EFE

Alderdi subiranistek Espainiako Konstituzioa «agortuta» dagoela aldarrikatu dute

Paulo Ostolaza

Konstituzioaren Egunaren bezperan, ohar bateratu bat plazaratu dute Llotja de Marreko akordioaren sinatzaileek. «Herrien autodeterminazio eskubidean oinarritutako eredu bat» eskatu dute.

 ©GORKA RUBIO / FOKU

«Gure ustez, beharrezkoa da EAJ gobernutik kanporatzea»

Gotzon Hermosilla

Ezker Anitza-IUk X. Batzarra egin du, eta EAEn «ezkerreko alternatiba sendo bat» osatu behar dela nabarmendu dute berriro, «Nafarroan egin denaren antzera».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.