Albistea entzun

MUNDUA

Ukraina gerra zibilaren atarian dela dio Errusiak

Lau hildako izan dira Kramatorsken izan den tiroketan, eguerdian. Ekialdeko matxinoen kontrako operazioa abiatu du gaur Ukrainak, atzo goizean emandako epea agortu ostean.

Ukrainako armadaren ibilgailu blindatuak, Slaviansketik gertu
Ukrainako armadaren ibilgailu blindatuak, Slaviansketik gertu / R. P./EFE

Berria -

2014ko apirilak 15 07:33

"Gerra zibila lehertzear da". Hala ohartarazi du Dmitri Medvedev Errusiako lehen ministroak. "Espero dut erabakiak hartzea dagokionak [Kievek] halako hondamendia ez baimentzeko adinako sen ona izango duela". Arazoari konponbidea emateko modu bakarra elkarrizketa dela dio Medvedevek, eta herrialdeko talde etniko guztien interesak aintzat hartzeko eskatu dio Ukrainari. "Zaila da, baina beharrezkoa. Jendeak bere iritzia agertzeko eskubidea dauka". Turtxinov Ukrainako presidenteak NBEri laguntza eskatu izana arbuiatu du, gainera: "Oro har, ez du ezer konpontzen haien presentziak. Zoritxarrez, arazoa mantendu besterik ez du egiten".

Tiroketa izan da gaur Kramatorskeko aerodromoan. Slaviansk hiritik gertu dago, "matxinoen gotorleku" deitu dutenetik. Ukrainako armadaren hainbat ibilgailu blindatu antzeman dituzte eguerdian, eta gutxi barru hasi dira istiluak. Rusia Today agerkariak zabaldutako informazioen arabera, 60 ibilgailu blindatu inguru zeuden Kramatorskeko aerodromoan. Hildakoak milizianoen aldean izan dira. Lau direla zabaldu den arren, zenbat izan diren ez dago guztiz argi; lau eta 11 bitartean izan daitezkeela diote Errusiako zenbait hedabidek; Efek, ez duela hildakorik ikusi. Aerodromoa kontrolatzen ari zen milizianoen buruaren arabera, duela egun batzuk ari zen Ukrainako armada erasoa prestatzen: "Jendeak, manifestariek, ez diete utzi sartzen, eta tirokatzen hasi dira, biktimak eraginez. Gureek [milizianoek] atzera egin dute. Hamabost tanke ari dira erasoan, eta gainerakoak ibilgailu blindatuak dira". Ukrainako Defentsa ministroak albistea jakin eta gutxira baieztatu du "operazio berezia" abiatu dutela Kramatorsken.

"Operazio antiterroristaren" lehen urratsak

Eguerdian zabaldu da Ukrainako hogei ibilgailu blindatu inguru eta garraio lanetarako bi helikoptero militar zeudela Izium herriaren inguruan, Slaviansk hiritik berrogei kilometrora. Hortik gertu dago, baita ere, Kramatorsk herria, eta aerodromoa. Gainera, Vasili Krutov jeneralak, Ukrainak abiatutako "operazio antiterroristaren" buruak, esan du ez zela ultimatum gehiagorik izango, eta "atzerriko inbaditzaileei" erasoko ziela. Krutoven arabera, hirurehun lagun armatu daude Ukrainaren ekialdean, gehienak Slaviansk hirian.

Ukrainako Gobernuak goizean jakinarazi du ekin diola herrialdearen ekialdean matxinatutako taldeen aurkako "operazio antiterroristari". Parlamentuko saioa hastean eman du operazioaren berri Oleksandr Turtxinov Ukrainako behin-behineko presidenteak. Azaldu duenez, operazioa "epeka, modu arduratsuan" egingo da, eta "Ukrainako herritarrak babestea eta izua etetea" du helburu. Ez du xehetasun gehiagorik eman. Bestalde, Kremlinek dio ez duela troparik bidali Ukrainaren ekialdera: "Adierazpen zentzugabeak dira. Han ez dago Errusiako troparik. Esana dute lehendik ere presidenteak eta atzerri ministroak".

Europako Batasuneko inteligentzia militarreko buru Georgij Alafuzoffek Finlandiako egunkari bati baieztatu dionez, ez du uste Ukrainaren ekialdean Errusiako troparik dagoenik. "Ez dira talde handiak. Jatorri errusiarra izan arren, bertakoak dira, eta besterik gabe, protestan ari dira egoerarekin ados ez daudelako", azaldu du Alafuzoffek.

Azken ultimatuma

Ukrainaren eraikin publikoak hartu zituzten taldeei ultimatuma eman zien Turtxinovek, hartutako bulego ofizialak uzteko. Astelehenean 07:00etan —Ukrainan 08:00etan— amaitu zen epea, eta atzotik ez zen Turtxinovek hitzemandako oldarraldiaren berririk.

Donetsk lehenbizi. Kharkiv gero. Eta Mariupol, Luhanks, Kramatorsk, Zaporizhia, Sloviansk eta Horlivka ondoren: Ukrainako hego-ekialdea egunez egun urrunago dago Kievetik. Errusiako hedabideek atzo zabaldu zutenez, presidenteak operazio militar bat abiatzeko dekretua sinatu zuen atzo arratsaldean; zenbait ordutan, erasoa edozein unetan gerta zitekeela zirudien. Iluntzean, ordea, oraindik ez zegoen balizko esku hartze militarraren berririk.

Putin-Obama deia

Ameriketako Estatu Batuek eta Europako Batasuneko hainbat estatuk Errusia jo dute Ukrainako Donetsk eskualdean piztutako indarkeriaren erantzuletzat. Igande gauean Nazio Batuen Erakundeko Segurtasun Batzordeak eginiko bileran, Vitali Txurkin Errusiaren NBErako mandatariak ukatu egin zuen Errusia gertakarien atzean dagoela, baina, gaur goizaldean, Barack Obama AEBetako presidenteak Vladimir Putin Errusiako presidenteari eskatu dio erabil dezala bere "eragina" matxinatutako taldeak kontrolatzeko.

"Presidenteak nabarmendu du Ukrainan dauden indar irregular guztiek armak utzi behar dituztela", azaldu du Etxe Zuriak ohar batean. Halaber, Obamak "kezka handia" azaldu du Errusiako Gobernuak talde horiei adierazitako" babesa" dela eta.

Putinek, berriz, Obamari eskatu dio bere esku dagoen guztia egin dezala "indarraren erabilera eta odolaren isurtzea" saihesteko, eta berriro ukatu du Errusia Ukrainako gertakarien atzean dagoela: "Kieveko erregimenak errusiarren eta errusiar hiztunen interesak aintzat hartzeko borondate eta gaitasun faltaren ondorio da [Ukraina] ekialdeko protesta".

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Saudi Arabiaren koalizioak gutxienez 12 pertsona hil ditu Yemenen, eraso batean

Saudi Arabiaren koalizioak gutxienez 12 pertsona hil ditu Yemenen, eraso batean

Igor Susaeta

Huthien buruzagi militar bat hil dute. Ordu batzuk lehenago matxinoek Abu Dhabin egindako erasoari erantzun dio nazioarteko koalizioak

Errusiako armadako tankeak Bielorrusiara iritsi berri, bi herrialdeen arteko ariketa militar bateratuetarako. ©EFE

Gerraren koreografian

Gorka Berasategi Otamendi

Errusiaren eta Mendebaldeko potentzien arteko saio diplomatikoak ez dira amaitu, baina bi aldeak mugitzen ari dira gatazka militar posible baterako

Bi hildako Tongan asteburuan izandako tsunamiarengatik

Bi hildako Tongan asteburuan izandako tsunamiarengatik

Berria

Komunikazio azpiegiturek kalte handiak jasan dituzte. «Inoiz ez bezalako desastre bat» da, gobernuarentzat

Roberta Metsola kontserbadorea, gaur, Europako Parlamentuan, ganberako presidente kargua jaso ostean. ©EFE

Roberta Metsola hautatu dute Europako Parlamentuko presidente

Ander Perez Zala

Eurodiputatu demokristauak sozialdemokraten eta liberalen babesa jaso du bozketan. Abortuaren aurkakoa da buruzagi kontserbadorea.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.