Albistea entzun

Euskal presoak

Ibon Iparragirre presoak "heriotza arrisku erreala" duela ohartarazi dute medikuek

Nahiz eta De Castro epaileak berak Iparragirreren amari aitortu dion haren egoera larria eta esan zion neurriak hartuko zituela, espetxealdi arindua ukatu diola salatu dute.

Etxerat elkarteak Bilbon eginiko agerraldia.
Etxerat elkarteak Bilbon eginiko agerraldia. / Argazki Press

Aitziber Laskibar Lizarribar -

2014ko urriak 3 10:17

Hiesa du Ibon Iparragirrek. 3 C estadiokoa, oso garatua, larria eta sendaezina. Ahul dago, oso gaixorik. Baina epaileak ukatu egin dio 100.2 artikulua oinarri hartuta espetxealdi arindua ezarri eta espetxe zigorra etxean betetzea.

Ez da hiesa, ordea, Ondarroako presoak duen gaitz bakarra. Horrek neurologikoki larri eragin dio. Besteak beste, dementzia koadroa sortu dio. Miren Arana Jaiki Hadiko sendagileak azaldu duenez, "psikosi motako jarrera oldarkorraren nahasmena nagusitu da harengan, bere baitako errealitatearen interpretazio eta fabulazio paranoikoek bere inguruarekiko harremanetan gatazken arriskua areagotuz".

Eta ez da hori gaitzaren alderik errazena. Gaixotasuna arintzeko modu bakarra bere konfiantzazko lagun eta senideek babestu eta zaintzea den arren, Navalcarneroko espetxean bakartua dute, gainera. Eragina zuzenean ikusten du Angelita Burgoak semea ikustera kartzelara doan bakoitzean: "Egunetik egunera okerrago dago". Are, semea espetxean, bakarrik, maite dutenen babesik gabe hilko den beldur dela azaldu du hedabideen aurrean egindako agerraldian. Izua diola horri, baina litekeena dela hori gertatzea.

Haren egoeraren azterketa egiten duten sendagileek ere eman dute alarma abisua: "Ibon Iparragirre bizitza arrisku errealean duen pazierte bat da".

Berehala askatzeko eskatu dute, beraz, Etxerat-ekin egindako agerraldian. Gutxienez, 100.2 artikulua ezarri eta espetxe zigorra etxean betetzeko aukera emateko. Legeak hala diola ohartarazi du Ane Ituiño abokatuak. Gainera, martxoan atxilotu zuten arte zigorra etxean betetzean ari zela nabarmendu du, segurtasun neurri zorrotzak agindu bezala bete dituela beti, eta inoiz ez dela alor horretako arazorik izan.

Espetxealdi arindua ezartzearen aurka jaso duen aginduari erreforma helegitea aurkeztu dio abokatuak. Ezezkoa eman zuen De Castro epaile berak ebatzi beharko du gaixoa espetxetik ateratzeko eskaeraren inguruan, eta ez du hartarako eperik.
 

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...