Nekazari Ondareen zerrendarako hautagaitza aukeztu zuen Añanak joan den uztailean, FAOk Erroman egin zuen konferentzian, eta orain egun gutxi gatzaga bisitatzen izan zen Mauro Agnoletti FAOko aditua, ingurua bertatik bertara ezagutzeko. Agnoletti harrituta gelditu zen, eta 75 herrialdetan gatza nola ekoizten den ezagutu duen arren, nabarmendu zuen sekula ez zuela halakorik ikusi. "Gatz Harana bakarra eta apartekoa da", adierazi zuen.
Añanako gatzagan azken 6.500 urteetan ekoitzi da gatza, era naturalean eta tradizionalean, eta hura berreskuratzeko proiektuak Europa Nostra kultur ondareentzako sari ezaguna jaso zuen 2015ean.
