Agus Barandiaran gidari duen musika taldeak 50 emanalditik gora egin ditu Korrontzi dantzan proiektuarekin, bai Euskal Herrian eta bai atzerriko hainbat herrialdetan. Orain, egitasmoak telebistara egingo du jauzi, lau haizeetara zabaltzeko asmoz. Egitasmo horretan, Korrontzik emanaldia eskaini behar duen herriko dantza taldeekin koreografia desberdinak lantzen dituzte. Hori izango da dantzari amateurren erronka nagusia: Korrontzi taldearen koreografiak dantzatzea, herri osoaren aurrean.
Erronka betetze aldera, Agus Barandiaran arduratuko da trikitiarekin koreografiei doinua jartzeaz, eta Izaskun Iturri dantzariak erakutsiko dizkie koreografien oinarrizko urratsak herritarrei.
Sopelako (Bizkaia), Zarauzko (Gipuzkoa) eta Bermeoko (Bizkaia) dantza taldeak hartuko ditu protagonista ETB1 kateko saioak. Emanaldia nola prestatzen duten ikusi ahal izango da, eta jendaurreko ikuskizunaz gozatu.
Korrontzi dantzan saio berriaren abiaburua Sopela izango da. Emanaldian oholtzakide izango dituzte dantzari gazteak ezagutuko dituzte Barandiaranek eta Iturrik, eta euren ikuskizunean parte hartzeko erronka jarriko diete. Hori bai, oholtza gainean aritzeko, maila bikaina erakutsi behar dute, eta ez dute koreografiak ikasteko denbora askorik izango. Beraz, gogotik egin beharko dute lan, Iturriren gidaritzapean.
