Bilboko Aste Nagusiak jadanik badu aurtengo irudia. Udalak gaur jakinarazi du zein izango den aurtengo kartela: Besarkada urdin bat Bilborentzat. Horiek horrela, Juan Manuel Martinez Rodriguezek egindako irudiak iragarriko ditu jaiak; abuztuaren 22tik 30era iraungo dute aurten.
Aurtengo Aste Nagusiko irudi ofizialak zapi urdin bat erakusten du hondo zuri baten gainean. Izan ere, zapi urdinak dira Bilboko jaietako ikurretako bat. Horrez gain, Aste Nagusiko datak erakusten ditu, euskaraz eta gaztelaniaz, eta kolore urdinez horiek ere. Epaimahaiak «ikusmen inpaktua eta kalitate teknikoa» kontuan hartuta egin du Martinezen lanaren alde, eta iritzita Aste Nagusia festa «orotariko eta alai» moduan irudikatzen duela.
Bilboko Udalak gaur jakinarazi duenez, Martinezen irudia botoen %43,9 eskuratuta gailendu da kartel lehiaketan. Lan hori beste seirekin lehiatu da finalean, baina 276 proposamen jaso dituzte guztira, udalak jakinarazi duenez.
Erabakia ez da soilik epaimahaiaren esku egon: herritarren botoen araberakoa izan da lan bakoitzaren puntuazioaren %70, eta beste %30a epaimahaiko kideen balorazioaren araberakoa. Martinezek, bere lana kartel ofizial gisa erakusteko aukera izateaz gain, 3.000 euroko saria lortu du.
