Egitaraua

GAUR

•Erregelu gunea. Goiz guzian, 10:00etatik goiti, urtero bezala Elkarteen herrixkaizanen da gaur, Erregelu gunean. Euskal Herriko herri eragile ugarik egiten duten lana ezagutzeko parada izanen da. 10: 00etatik goiti, halaber, artzain-txakur txapelketaz gozatu ahal izango da. 100 ardiren gibeletik ibiliko dira hainbat artzain txakur, beren artzainen ondoan. Euskal Herriko Laborantza Ganberak egin zikiroa bazkaldu ahal izango da 14:00etan, Kuxkuxtu txarangak alaiturik.

•Oholtza handia, Gibel Herri. The Abyssinians talde jamaikarrak kontzertua emanen du 16:00etan, oholtza nagusian. Ondotik, Bebe bakarlari espainiarra igoko da eszena gainera, 18:00etatik aitzina. Su Ta Gar talde eibartarraren txanda izango da ondoren 20:00etan. Bukatzeko, Raggasonic Pariseko ragga taldeak emanen dio amaiera oholtza handiko kontzertuei, 22:00etatik aurrera.

•Oholtza txikia, Urbeltzeta. Pentzeko oholtza txikian arratsaldeko bostetan hasiko dira kontzertuak gaur, Laket taldearekin. 19:10ean Vendetta taldeak emanen du kontzertua, eta, azkenik, HK&Les Saltimbanks taldeak , 21:15etik aitzina.

•Antxarteta gunea. Bost talderen kontzertuak ikusi ahal izango dira, Iparraldeko Konpilazioaren eskutik. 12:00etan, Steph Dessein izanen da; 12:55ean, The Lookers; 13:50ean, Begiz Begi; 14:45ean Torii; eta bukatzeko, 15:40ean, The Balladurians.

•Itsasoa gunea. Xentimorik gabe deitu antzezlana ikusi ahal izango da gaur, 14:00etan. Ondotik, EHZak bultzatu Sorgin egitasmoaren kari, Behelaino antzezlana sorkuntza izanen da ikusgai, arratsaldeko lauetatik aitzina.

•Plazako gunea. Goizeko hamarretatik goiti, Sopongo musika taldearen kontzertua izanen da Heletako plazan. Hamaiketan, zigante eta gaiteroak bertaratuko dira, Orkresta taldearekin batera. Ordubata eta erdian Herrira-k antolaturik, EHZrekin elkarlanean, euskal preso politikoen aldeko lipdub-a grabatuko da, urriaren 13rako manifestaziora deitzeko. Arratsaldeko bostetan Kukai dantza taldeak emanen du dantza ikuskizuna. Karrikan ikuskizunaren Sorbatza atala eskainiko dute Kukai taldeko dantzariek.