Euskadi Irratiari sekulako datua eman dio EGM Estudio General de Mediosek bere azkeneko neurketan: 120.000 entzule. Urtean hiru neurketa egiten ditu EGMk, eta hirugarrena da gaur publiko egin dutena. Elkarrizketa pertsonalak eta telefono deiak eginez neurtzen dituzte hedabideen jarraitzaile kopuruak.
Deigarria da Euskadi Irratia Radio Euskaditik oso gertu gelditu dela. Izan ere, Radio Euskadik 153.000 entzule ditu astegunetan, euskarazko irratiak baino 33.000 gehiago baino ez.
Gazteak 102.000 entzule ditu egunero, eta EITB Musikak, 26.000. Radio Vitoriak, berriz, 28.000 entzule ditu, EGMren arabera.
EITB talde osoak, telebista kateak eta irratiak batuta, 1.056.000 ikusle eta entzule ditu; telebistako lau kateak 651.000 lagunek ikusten dute, astelehenetik igandera.
