Igartubeiti: baserrira hurbiltzeko aukera

Gipuzkoako Ezkio-Itsaso herrian dagoen Igartubeiti baserri museoak euskal baserriaren historiara hurbiltzeko aukera eskaintzen du.

Igartubeiti XVI. mende erdialdean eraiki zuten, eta euskal baserriaren Urrezko Aroaren adibide paregabea da. Baserria XVII. mende hasieran iritsi zen bere unerik onenera, bizimodu eta lan berriei egokitzeko zabaldu eta aldatu egin zutenean. Jatorrizko egurrezko egitura egoki mantendu izanak eta barruan duen sagardo dolareak Euskal Herriko baserri interesgarrietarikoa bihurtu dute.

Gipuzkoako Foru aldundiak 1992. urtean erosi zuen Igartubeiti baserria, desager ez zedin. Erabat zaharberritu ondoren, baserriak XVII. mende hasieran zuen itxura berreskuratu zuen.

Barrutik, antzinako baserrien egiazko bizitza birsortzen duen museo bihurtu da, eta duela lau mende euskal baserria nolakoa zen jakin daiteke: argirik ez du, eta jatorrizko altzari eta tresnak ditu.

Interpretazio zentro bat ere badu. Bertan, mila urtetik gorako euskal baserriaren historia birsortzen da. Igartubeitiko familia eta bizilagunen ahotsen bidez, antzinako baserrien hazkunde eta bilakaera eta biztanleen bizimodu eta lanak ezagut daitezke.

Aste Santuko oporren ondotik, udako ordutegia hartu du museoak, eta asteartetik igandera dago zabalik. Goizeko hamarretan irekitzen dute, ordu biak arte, eta, arratsaldetan, lauretatik zazpiak arte.