Inauteriak Baionara helduko dira asteburua pasatzera

Euskal Herriko herri gehienak atzean utzi ondoren, inauteriak Baionara iritsiko dira asteburuan. Zanpantzarrek kaleak hartuko ditu, eta Mexiko gaiaren inguruan girotuko dute hiria. Bihar eta larunbatean musika eta festa izango dira hiriko kaleetan.

Bihar goizean txikienek mozorroak jantziko dituzte, eta ikuskizuna eskainiko dute Lauga aretoan. 13:30ean, berriz, Lehen Hezkuntzakoen txanda helduko da. Arratsaldean poteo musikalean parte hartzeko aukera egongo da Baiona Txikian, eta mozorrotzen direnentzat sariak iragarri dituzte zenbait taberna eta jatetxek. 19:30etik 21:00etara bitarte luzatuko da festa.

Larunbata inauterietako egun handia izango da; Xaho kaia zanpantzarren hiria bilakatuko da egun osoan. 11:00etatik aurrera, Mexikok eta Euskal Herriak bat egingo dute hainbat jardueren bitartez: gozo-eltze jokoa, kirola eta umorea uztartzen dituen jokoa, eta Mexikoko ohiturak ezagutzeko erakusketa dira antolatu dituzten ekintzetako batzuk. Puzgarriak eta barrakak ere jarriko dituzte, eta zaldi ikuskizun bat ikusi ahal izango da. Inauteriak agurtzeko su festa, suzko zezena eta musika prestatu dituzte.