Espainiako eta Portugalgo paleontologo talde batek duela 145 milioi urte bizi izan zen Lusovenator dinosauro espeziea aurkitu du Portugalen. Ipar hemisferioko Carchadontosaurus erregistrorik zaharrena da. Ezagutzen den harraparirik handienetakoa zen dinosauro mota hori.
Espezie berria bi dinosauro aleren arrastoetatik —gazte bat eta heldu bat— abiatuta katalogatu dute. Lisboatik iparraldera dauden bi aztarnategitan aurkitu dituzte, bata bestetik 25 kilometrora: Valmitao hondartza, Lourinhrasen, eta Cambelas hondartza, Torres Vedrasen.
Paleontologo taldea aztarnategietako batean lanean, Portugalen. EFE
Ezin izan dute dinosauroen hezurdura osoa aurkitu; baina, Elisabete Malafaia Lisboako Unibertsitateko paleontologoak adierazi duenez, «ez da ohikoa hezurdura osoa aurkitzea». Hala ere, ale batetik hainbat orno eta pelbiseko elementuak aurkitu dituzte, eta bestetik oin ia osoa eta ornoen sekuentzia bat. Dinosauroen tamainari dagokionez, ale gazteena hiru metro ingurukoa izan zitekeela uste dute, helduena, berriz, sei edo zazpi metrokoa.
Aurkitutako zati batzuk. @efmalafaia
Elisabete Malafaia eta Fernando Escaso Urrutiko Hezkuntzako Unibertsitate Nazionaleko (UNED) paleontologoak jakinarazi dutenez, ia hogei urte pasatu dira fosilak aztertzen hasi zirenetik espezie berri gisa katalogatu duten arte. Hala ere, duela urte batzuk konturatu ziren aleek «zerbait arraroa» zutela. Izan ere, «ezagutzen ziren formen ezaugarri batzuk» zituzten, baina «zerbait desberdina» zutela adierazten zuten.
Orain arte, Carchadontosaurus dinosauroek ipar hemisferioan zuten presentziaren azken erreferentzia Behe Kretazeoan zegoen erregistratuta —duela 130 milioi urte—. Aurkikuntzaren ondorioz jakin denez, ordea, Goi Jurasikoan ere bizi izan ziren, orain arte uste zen baino hamabost edo hogei milioi urte lehenago.
