KOMUNIKAZIOA. 'Gaur Egun' eta 'Teleberri' noiznahi EITBren webgunean

Euskal Telebistaren albistegiak Internetera iritsi dira. Datorren astelehenetik aurrera, Gaur egun eta Teleberri albistegiak, eguerdikoak nahiz gauekoak, oso-osorik ikusi ahalko dira www.eitb.com webgunean. Erabiltzaileak, gainera, une oro izango ditu eskuragarri azken zazpi egunetako albistegiak. Titularrak bakarrik edo albistegia osorik ikustea aukeratu ahal izango du gunean sartzen denak. Horrez gain, albistegiak zuzenean Internet bidez ikusi ahalko dira.

Roberto Montalvillo ETBko albistegietako zuzendariak honako hau adierazi du emandako pausoaz: «Albistegiak webgunean jarrita, kontsumitzeko modu berriari erantzutea eta erabiltzea ez da zertan plataforma tradizionaletara lotuta egon». Horrez gain, nabarmendu du ikus-entzule potentzialen beharretara egokitu direla, «EITBren informazioa jasotzeko erraztasunak jarrita eta albistegien presentzia taldeko baliabide guztietan nabarmenduta».

Edurne Ormazabal Eitb.com-eko zuzendariak, berriz, honakohau adierazi du: «EITB taldeko plataformak bateratzeko, beste pauso bat eman dugu; gainera, marka sendotu dugu, eta gure zerbitzu publiko izaerari erantzun diogu».

EITBren webgunean, bestalde, Euskadi Irratiko emisioa zuzenean entzun daiteke, eta orduz orduko albiste buletinak jartzen dituzte. Baita Radio Euskadikoak ere.