Jose Ramon Becerra. Ingeniaria eta ekologista

«Langabeziaren %60 ken liteke Iparraldean»

Enplegu berdeei esker Ipar Euskal Herriko langabezia asko jaits daitekeela dio. Horretarako, ordea, agintarien aldetik neurriak eskatu ditu. Halakorik izan ezean presio soziala egin behar dela esan du.

L. JAUREGIALTZO / ARP.
Lander Muñagorri Garmendia.
2015eko apirilaren 16a
00:00
Entzun
Ingurumenarekiko kezka aspalditik dauka Jose Ramon Becerra ingeniariak, eta, horregatik, azken hogei urteetan ildo horretan ari da lanean. Hego Euskal Herrian Ekokontsumo federazioko idazkaria izan da, eta industriaren segurtasun eta ingurumenaren arloan ere jardun du. Ipar Euskal Herrian, 10.000 lanpostu klimatiko sor daitezkeela ondorioztatu du Bizi plataformarentzat egin berri duen ikerketan. Hori lortu ahal izateko, borondatea eskatu die politikariei.

Ipar Euskal Herrian 10.000 lanpostu iraunkor sor daitezkeela ondorioztatu duzu. Zer aukera legoke proposamen horrek aurrera egiteko?

Aukerak badaude, baina ez da aukera kontua bakarrik, politikak modu eraginkorrean aldatu behar dira. Energia aurrezteko, mugikortasuna aldatzeko edo hondakinen kudeaketa hobetzeko, besteak beste. Horretarako, ekimena eta indar politikoa behar da, eta une honetan kolokan dago. Bestalde, diru publikoa kudeatzen dutenen aldetik, finantzaketa behar da, eta, murrizketak direla eta, ikusteko dago zertan geratuko litzatekeen. Baina kontuan hartu behar da Europako Batzordeak klima aldaketaren inguruan esan duena: hura geldiarazteko egin beharreko esfortzu ekonomikoa BEZaren %2 izango litzatekeela, baina egiten ez bada BEZaren %20 gastatu beharko zela ondorioak konpontzen. Beraz, kontua ez da dirua badugun edo ez, baizik eta dirua sartu behar dugula. Konpontzeko edo neurriak hartzeko, hor dago erabakia.

Aurreikuspenarekin jokatu behar da, beraz.

Noski. Gainera, kontuan hartu behar da enplegu hauek ez direla deslokalizatzen errazak. Gehienetan kalitatezko enpleguak dira, eta lurraldean bertan geratzeko izan ohi dira. Alde horretatik ere, interesgarria da enplegu berdea.

Politikariek asmorik badute?

Oraingoz, ez. Nik pentsatu nahi dut politikariak oraindik ez direla jabetu zer-nolako egoera daukagun ingurumenaren kasuan. Finantza krisiari buruzko mezuak entzuten ditugu egunero, baina krisi ekologiko eta energetikoa ez da agenda mediatikoan sartu oraindik. Politikariak egoeraz jabetzean hartuko dituzte neurriak, edo hori pentsatu nahi dut.

Ipar Euskal Herriko agintariengan zer jarrera sumatu duzu?

Han, hemen bezala, politikarien jarrerak antzekoak dira. Haien kezka egoera ekonomikoa da, eta ez dute egoera aldatzen jakin. Klima aldaketaren lehen ondorioak ikusten ari gara, eta Bizi plataformak mahai gainean jarri nahi du enplegua sortzeko bide berri bat.

Ana Oregi Jaurlaritzako Ingurumen sailburuak esan zuen enplegu berdea etorkizuneko giltza izan daitekeela...

Ez. Hemen, Hegoaldean, Jaurlaritzak 30.000 enplegu sortzeko plan bat aurkeztu zuen duela urte bat. 6.500 milioi euro gastatu nahi zituen enplegu horiek sorzeko. Ez ditugu emaitzak ikusi, eta gaur-gaurkoz Jaurlaritzaren plan bakarra AHTa egitea da. Eta hori adreiluaren betiko ekonomia da, eraikuntza enpresen mesederako egindakoa. Enplegu berdea? Elikagaien %95 inportatu egiten ditugula ikusita, zer egin dute lehen sektorea berrindartzeko? Eta energia aurrezteko? Energiaren %80 inportatu egiten dugu. Ez dute ezer berririk egin.

Langabezia denen ahotan dagoen testuinguruan, proposamen interesgarria bada, ordea.

Noski! Pentsa, Iparraldean enplegu horiekin langabeziaren %60 kenduko genuke.

Erakundeen zain egon beharrean, ekonomia berde hori indartuz joateko zer beste aukera legoke?

Ekimen pribatuak badatoz, baina askoz motelago. Energia berriztagarrien kasuan, esaterako, diruz lagunduta dauden energia zikinekin ari dira lehian. Gobernuek babesten dituzte, bertan jarrai dezaten. Beraz, energia berriztagarriek laguntzarik ez badaukate, askoz ere zailagoa da proiektuak aurrera ateratzea. Martxan badaude proiektuak, ordea. Horrez gain, gizarteak ahalegina egin behar du kontsumo arduratsuagoa egiteko, eta energia garbien aldeko apostua egiteko. Baina hori bakarrik ez da nahikoa, erakundeetatik eta ekimen politikotik bultzada behar dugu ekonomia berdea martxan jartzeko.

Ekimen politikoa bideratzeko, beraz, presioa egin behar dela pentsatu behar da orduan?

Hori da. Bizi plataformak plazaratu duen ikerketa politikariak deitzeko aukera bat da, galdetzeko zein izango den euren eredua.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.