Bosgarren urtez dokumental sortzaile, eragile eta zaleen arteko topaketa izan da Lupa mostra. Lanen proiekzioaz gain, Euskal Herriko eta nazioarteko sortzaileak Errenterian eta Donostian izan dira ikusleekin solasean.
Aurtengo mostra amaitzeko, gaur bi lan emango dituzte Donostiako guardetxean. Batetik, Mikel Zatarainek zuzendutako Lanbroa film laburra ikusi ahalko da. «Euskal Herrian badago halako ikonografia moduko bat baserritarren inguruan, baina ahaztuta daude, baztertuak», dio Zatarainek. Film labur horretan, begirada «erradikalizatzen» saiatu zen. «Enkoadratzea, edizioa eta naturarekiko lotura eta naturan gertatzen den mentura faktorea da Rigako dokumental poetikoaren eskolaren ezaugarri nagusia. Horiek hartuta, eguneroko gauza arruntetan bitxitasuna bilatzen ahalegindu naiz», azaldu zuen Zatarainek lana aurkezterakoan.
Las afueras lana Alvaro Sauk eta Ferran Mendozak egina da. «Landa-guneen gaineko begirada hiriak bezain zaharra da, baina zoritxarrez, hesiz kanpoko munduaren izaerari aldez aurretik eraikitako ikuskera idealizatu bat gaineratzen zaio», diote egileek. Mundu horren egunerokotasuna jasotzen du dokumentalak.
V. LUPA DOKUMENTALEN MOSTRA
Noiz. Gaur, 19:00etan.
Non. Donostiako Guardetxean.
Lupa mostraren azken eguna
'Lanbroa' film laburra eta 'Las afueras' dokumentala ikusi ahalko dira gaur arratsaldean Donostian
Iruzkinak
Ez dago iruzkinik
Ordenatu
