Sei zezenak batera atera dira San Domingoko ukuilutik. Joaldunak atzean utzita abiatu dira aldapan gora, baina, metro gutxitara, sei zezenetako bat atzera itzuli da. Gainerakoek zezen plazarako bidea egiten zuten bitartean, han ibili da zezen hura, aldapan behera jaitsi da, eta ukuilura sartu. Azken zezenei plazara iristen laguntzeko erabiltzen dituzten joaldunekin atera da ukuilutik, baina berriz ere barrura sartu da. Halako batean, ibilbideari ekin diete.
Ordurako iritsiak ziren gainerako bost zezenak zezen plazako ukuiluetara. San Domingoko aldapan pertsona bati adarra sartu dio zezen batek, eta gauza bera gertatu da Udaletxeko plazan ere. Baina, ohi duten gisan, Estafeta parean taldea luzatu egin da, eta korrikalarientzako tarteak egon dira. Lasterraldi politak izan dira. Ikusi dira korrikalari batzuk airean, baina, itxura batean, kale horretan ez diote inori adarrik sartu.
Bost zezenak plazan zirela, ibilbidearen hasieran zegoen arrisku gunea. Orduantxe abiatu da azken zezena joaldunekin. Haiek ondoan zituen arren, solte egin du bidea, eta korrikaldi ederrak egin dituzte lastekariek.
