Uda aro oso ona izan da Netflix plataformarentzat, errentagarritasunari dagokionez: uztailetik irailera beste 8,76 milioi harpidedun bereganatu ditu. Hartaz, munduan harpidedun gehien duen streaming plataforma da: 247,15 milioi harpidedun ditu mundu osoan. 2020. urtetik hiruhileko batean izan duen gorakadarik handiena da.
Iragarki bidezko harpidetzak ia %70 hazi dira, eta egun mundu osoko harpidetza egiten duten hamarretik hiruk iragarkiak dituen aukera baliatzen du.
Netflixen diru sarrerak hiruhileko horretan 8.090 milioi eurotakoak izango dira —iaz garai berean baino %7,8 gehiago—. Aurtengo lehen bederatzi hilabeteetan, AEBetako konpainiaren irabaziak 4.233 milioi eurokoak izan dira. Diru sarrerak, berriz, 23.574 milioi eurokoak dira urtea hasi denetik.
Datu horiek eragina izan dute burtsan: ostegunean, Netflixen akzioek %18 egin zuten gora. Hurrengo hiruhilekoari begira ere iragarpenak onak dira, eta plataformak espero du diru sarrerak %10,7 haztea iazko datuekin alderatuta.
Bestetik, Netflixek iragarri du harpidetzen prezioa igo egingo duela AEBetan, Erresuma Batuan, Frantzian eta Lapurdi, Nafarroa Beherea eta Zuberoan.
Netflixek hiru urteotako gorakadarik handiena izan du udan
Iruzkinak
Ez dago iruzkinik
Ordenatu
