Txapel beltzak Athletici argitu dio burua gaur Anoetan, Euskal Herria Txapelaren finalean. Sasoiari gorabeheratsu ekin ondotik, bi taldeek aukera ederra zuten aldartea hobetzeko, eta zuri-gorriek zuku gehiago atera diote arratsari. Ez da partida ikusgarria izan inondik ere, baina bisitariek meritu gehiago egin dituzte irabazteko. Lehen zatian hainbestean, baina bigarrenean nagusi izan da Edin Terzicek entrenatutako taldea, eta Maroanek buruz sartutako gol batek eman die titulua bilbotarrei. Atzean sendo jokatu dute, eta erasoan Reala baino finago aritu dira. Jokalari garrantzitsuak falta zituela gehiegi nabaritu du Pellegrino Matarazzoren multzoak, eta nahi eta ezin aritu da erabat. Hala, laugarren aldiz irabazi du txapela Athleticek, eta hura da buru sailkapenean. Hiru titulu ditu Osasunak, eta bakarra Realak.
Partidak berak baino emozio handiagoa izan du atarikoak, omenaldi hunkigarria egin baitiote Mikel Etxarriri. Realaren harrobian eta Eibarren eginiko lanaren aitortza jaso du entrenatzaile ohiak, baita euskal selekzioaren alde egindakoagatik ere. Horregatik, bi ikur handi izan ditu alboan: Jose Angel Iribar eta Inaxio Kortabarria. Bideo batean, berriz, urteetan Etxarriren ondoan lanean aritutako hainbat teknikarik hitz egin dute: Unay Emeryk, Jagoba Arrasatek, Jabo Iruretak, Iñigo Perezek, Beñat San Josek, Mikel Labakak eta Andoni Iraolak, hurrenez hurren. Eskerrak eman dizkiote Etxarriri, maisu gisa aitortu dute, eta futbolarekiko duen pasioa nabarmendu dute. Omenaldia amaitzeko, ohorezko sakea egin du omenduak berak, eta txalo zaparrada handia jaso du.
Ekitaldiaren garrantzia tarteko, hamar minutu geroago ekin diote finalari, baina bi taldeetako jokalariak ez dira nonbait garaiz esnatu, astunak eta motelak izan baitira lehen minutuak. Lagunartekoa izan arren, denboraldiko partidetan gutxi jokatzen ari diren jokalariek aukera ederra zuten beren berri emateko, baina ez dute aukera askorik baliatu. Baloiarekin zerbait gehiago proposatu dute hasieran zuri-gorriek, baina ez dute batere sakontasunik izan. Realak nahiago izan du atzean itxaron eta pixkanaka neurria hartu lehiari. Aurrelari petorik gabe jokatu duenez, apur bat galduta ibili dira txuri-urdinen erasoko jokalariak.
Aldaketek mesede
Lehen ordu laurdena betetzearekin batera animatu dira bi taldeak, batez ere bilbotarrak. Johaneko izan da onena. Ezker hegaletik joan-etorrian ibili da erabat, eta fin aritu da pare bat jokalditan. Gol bat ere sartu du, 17. minutuan, baina baliogabetu egin dio epaileak, baloia eskuarekin ukitu duelako. Nahiz eta distiratsu jokatu ez, arriskutsuago agertu da Terzicen taldea. Lehen zatiko azken jokaldian langara bidali du baloia Maroanek.
Bigarren zatian ireki egin da lehia, beste bizitasun eta erritmo batekin zelairatu baitira bi taldeak. Aihenek gol ederra sartu du hasieran, baina jokoz kanpo zegoen. Beste aldean, Marrero izan da protagonista. Goi mailako bi geldiketa egin ditu bata bestearen jarraian, eta hark eutsi dio emaitzari bere horretan. Dena den, ezin izan du ezer egin Maroanen burukadaren aurrean, 58. minutuan. Robert Navarroren erdiraketa bati erremate bikaina egin dio aurrelariak, eta sareetara bidali du baloia. Gol horrek aldatu egin du finalaren gidoia. Aurrerapausoa eman du Realak, baina kalitatea falta izan zaio erasoan. Harrobiko gazteak ez dira gai izan zuri-gorrien atezaina estutzeko. Athleticek, berriz, arazorik gabe eutsi dio emaitzari, eta merezita jantzi du txapela.
REALA-ATHLETIC
Reala. Remiro; Ruperez (Lebarbier, 84. min), Beitia, Pacheco, Aihen (Sergio Gomez, 59. min); Gorrotxategi (Agirre, 70. min), Turrientes (Soler, 70. min); Marchal (Dani Diaz, 59. min), Zakharyan, Pablo Marin (Barrenetxea, 61. min); eta Guedes (Carrera, 84. min).
Athletic. Santos; Hugo Rincon (Areso, 61. min), Yeray (Jauregizar, 46. min), Paredes (Vivian, 70. min), Johaneko (Yuri, 70. min); Prados (Gerenabarrena, 61. min), Rego, Canales (Sancet, 61. min); Robert Navarro, Berenguer (Nico Serrano, 46. min) eta Maroan (Guruzeta, 70. min).
Golak. 0-1: Maroanek (58. min).
