Pasaia, Lezo, Errenteria eta Oiartzun, Gipuzkoako Oarsoaldea eskualdeko herriak, aberatsak dira historia, ondare, kultura eta natura aldetik. Familiarekin gozatzeko plan ederrak egin daitezke.
Pasaia: portu baten arima eta energia
Pasaiari itsasontzien joan-etorriek, portuko erritmoak eta kaleko bizitasunak ematen diote izateko era. Albaola Itsas Kultur Faktorian, ontziak egiteko egurraren usainak eta Ozentziyo erakusketa berriak gure itsas historiaren handitasunera eramango gaituzte. Ondoren, Mater ontzi-museoan, itsasoaren zaindari izatea zer den ikasiko dugu. Eta plana borobiltzeko, Pasai Donibane edo Pasai San Pedroko alde zaharrak zeharkatuko ditugu.
Ostiral Santu arratsaldean, lur ematearen prozesioa ikusteko aukera dugu, gainera. Pasai Donibane giro magikoz beteko da: lepakariek ibilbideko bost tunelak igaro beharko dituzte, pausoak altxatuz eta jaitsiz, kalea oliozko lanparatxoz eta kandelaz argitzen den bitartean.
Lezo: herri giroari bikain eusten dion tokia
Lezo Jaizkibel mendiaren magalean dago, eta Pasaiako portuari begira. Haren herrigunea bikain kontserbatutako jauregi eta etxe dotoreek osatzen dute. Gurutze Santuaren basilikan derrigorrezko geldialdia egin behar da. Bertan, bizarrik gabeko Kristo ospetsua aurkituko dugu, kondairaz betetako irudia.
Gainera, Lezo naturaz inguratuta dago, eta herrigunetik bertatik Jaizkibelera edo Altamira-Bordatxo aldera jotzeko mendi bide ederrak zabaltzen dira. Ibilbide horietan, gure memoria historikoa eta ondarea hurbilagotik ezagutzeko aukera daukagu.
Plan aktiboagoa nahi izanez gero, bizikletak alokatzeko zerbitzua dago Lezon; bidegorri sareari esker, modu erraz eta erosoan lotzen da Arditurriko Bide Berdearekin. Pedal kolpe gutxi batzuetara, natura eta historia zain ditugu.
Errenteria: kulturaren eta sormenaren habia
Errenteriari bere industria iraganak nortasun berezia eman dio, eta gaur egun kultura eta sormena arnasten dira bazter guztietan. Manchester txikia izatetik herri bizi, plural eta koloretsua izatera pasatu da. Herrian murgilduta, Jantziaren Zentroak janzkeraren bilakaera erakutsiko digu, eta Fanderiako Errotak-Ibaiaren Etxeak gure industria ondarearen sustraietara eramango gaitu.
Giro bizia topatuko dugu bertan: merkataritza txikia, terrazak eta jendearen joan-etorria. Hemen, sormena kalean dago.
Aste Santu honetan, gainera, San Marko gotorlekua berriro irekiko da: historia eta inguruetako begiratokirik zoragarriena uztartzen dituen txokoa.
Oiartzun: naturarekin sustraitutako bailara
Oiartzun guztiz murgilduta dago naturan. Pasaiako badia Aiako Harria Parke Naturalarekin lotzen duen Arditurri Bide Berdeak herria osorik zeharkatzen du, eta oinez edo bizikletaz joateko gonbita egin. Bidean zehar, geldialdi interesgarriak egingo ditugu: Luberri Geologia Museoan lurraren sekretuak ezagutzeko, eta Soinuenea Herri Musikaren Txokoan gure doinuen sustraietan murgiltzeko. Bideaz gozatzen laguntzeko, app bat dugu eskura interes-puntuen informazioarekin eta, behin Arditurrin, etxeko txikienentzako jolasteko joko dibertigarri batekin.
Aiako Harriaren magalera iritsita, Arditurriko meategia topatuko dugu. Bertan, lurraren sakoneraino jaisteko aukera paregabea izango dugu. Gogoan izan esperientzia honetaz gozatzeko sarrerak aurretik online erosi behar direla (www.arditurribideberdea.eus).
Gainera, Aste Santuan eta Pazko astean, Oiartzungo turismo bulegoa Arizmendienea etxe-museoan egongo da zabalik; etxe dotore hori barrutik ikusteko bisita gidatuak eskainiko dira.
Oarsoaldeari buruzko argibide guztiak jakin daitezke turismoa@oarsoaldea.eus helbide elektronikora mezu bat bidaliz gero, edo 943-49 45 21 telefono zenbakira deituta.
