Telekomunikazio taldeak arrakastatzat jo ditu emaitzak, eta espero du 2017an hastea 2016ko irabazien zati bat akziodunen artean banatzen. Emaitzen hazunde "sendoa" azpimarratu du Euskaltelek; R Cable erosi zuen iaz, eta bi konpainien irabaziak batuta heldu dira 14,6 milioietara.
Taldeak zehaztu du diru sarrerak batez ere etxebizitzen —%4,7 etekin gehiago lortu dute alor horretan— eta enpresen —%1,4— bidez hazi dituztela. Horrez gain, negozio guztietan bezero kopuru handiagoa lortu dute, 153.000 produktu berri kontratatuz; iazko datuekin alderatuta, %9,1 gehiago.
Bestalde, Euskaltel taldeko bezero berrien %81ek hiruzpalau produktu kontratatzen dituztela jakinarazi du konpainiak. Hori horrela, ordainpeko telebistaren kontratazioa %13,4 hazi da, eta %19 sakelako telefonoena.
