Iaz 4.600 milioi pakete txiki iritsi ziren Europako Batasunera, 2023an iritsitakoak halako bi. Gehien-gehienak, %91 inguru, Txinatik etorri ziren, Temu, Shein, Alibaba eta gero eta ezagunagoak diren beste enpresa batzuen bitartez.
Gaur egun, 150 euro baino gutxiagoko balioa aitortua duten paketeei ez zaie inolako muga zergarik ezartzen, baina hori laster bukatuko dela dirudi, eta tasa bat ordaindu beharko da pakete horiek Europara sartzean, oraindik zehazteko dago zenbatekoa.
Europako Batasuneko ministroek halaxe adostu dute gaur arratsaldean, eta, gainera, aurreratu egin dute neurria martxan jartzeko epea: hasieran 2028an ezartzeko asmoa bazuten ere, Maros Sefcovic Europako Batzordeko Finantza komisarioak esan du epe hori «bateraezina dela egoeraren larriarekin». Azkenean, tasa datorren urteko lehen hiruhilekoan jarri nahi dute indarrean.
Europako Batzordearen arabera, EBn sartzen diren pakete txikien %65i egiazko balioa baino txikiagoa aitortzen zaie, hain zuzen ere muga zergak ordaindu beharrik ez izateko. Horrek lehiari eta EBko konpainiei eragiten dieten kalteaz gain, ministroek kontuan izan dute salgaiak pakete txikietan banatzeak ingurumenean duen eragina ere.
