Zaldi okela eta debekaturiko ardi okela atzeman izanak sortu krisia dela eta, Castelnaudary (Aude) hiriko Spangheroren lantegian kanporaketak egon dira. Kanporaketen arduraduna Lur Berri dela diote langileek. Hain zuzen, Spangheroren jabe da Lur Berri Amikuzeko kooperatiba. Egoera salatzeko, Angeluko (Lapurdi) hiltegia blokeatzen dabiltza Spangheroko 40 bat langile. ELB sindikatuak ere elkartasuna adierazi die.
Kanporaketak ez onarturik, hainbat baldintza betetzea exijitzen diote zuzendaritzari, hots, Lur Berriri. Batetik, kanporatze saria hilabetean 1.000 eurokoa izatea, mutualitatea osoki zuzendaritzak ordaintzea eta urte bukaerako saria ere pagatzea. Ordu honetan, soilik hirugarren baldintza hori dute segurtaturik.
Debekaturiko 57 tona ardi okel atzeman zituzten Spanghero Lur Berri kooperatibaren enpresaren lokaletan martxoan. Behikia balitz bezala zaldikia ere erabili zutela jakin zen otsailean.
